Shillong, Nailur 06
U nongaiktien ka Bharatiya Janata Party (BJP), Bah H.M. Shangpliang ha ka Sngi Balang u la iehnoh kam na ka jinglong dkhot jong ka seng da kaba kynnoh ba ka don ka jingleh shiliang hapoh ka jingïalam u President, Bah Ernest Mawrie.
“Ki don ki mat bapher-bapher kiba nga la pynsngew na ka por sha ka por sha u State President kiba ïadei bad ka jingkiew jong ka seng hapoh ka Jylla khamtam ha ki jaka nongkyndong bad la ai jingmut ruh halor ki sienjam kiba dei ban shim, da kaba buh jingmut ïa ka jingbym leh bha jong ka seng ha ka ilekshon ba dang shu dep ha ka Jylla,” la ong u Bah Shangpliang ha ka kyrwoh iehnoh kam ba la phah sha u President ka seng.
U la ong ba u ju pynkynmaw ruh ïa u President na ka por sha ka por ban leh eiei halor ki jingtyrwa ban pynkhlaiñ ïa ka seng ha ki kyrdan bapher-bapher da kaba buh jingmut ïa ki kynrum-kynram hapoh ka seng.
“Halor kine, nga kwah ban kdew ba wat la nga dang kwah ban neh bad shakri ïa ka seng ha ka rukom kaba dei, nga sngewthuh ba katba ka jingleh shiliang ka dang don hapoh ka seng; kaba ïai bteng hapoh ka jingïalam u President ka State-BJP, kan pynthut lut ïa baroh ki lynti kiba lah ban urlong jong kiba trei hok bad ki nongkitkam kiba shaniah jong ka seng ban pyrkhat laitluid kumjuh ban kiew hapoh ka seng,” la ong utei u nongïalam barim ka BJP.
U la ong ruh, “Kumta nga kwah ban iehnoh kam mardor na ka jinglong dkhot jong ka BJP hapoh ka Jylla halor ki daw shimet.”
Ha kawei ka liang, utei u MLA barim ka Mawsynram u la pynpaw ka jingburom ïa u Myntri Rangbahduh ka ri, u Narendra Modi ban ïoh trei hapoh ka jingïalam jong u naduh ba u la pynrung dkhot ïalade sha ka BJP ha u bnai Naiwieng, 2022 lem bad kiwei-kiwei ki dkhot na Ri-lum Garo ha ryngkat ka jingdonlang ki nongïalam ba rangbah jong ka seng ha New Delhi.
“Nga dei ban pynpaw ka jingsngewnguh ïa u Dipayan Chakravarty, Vice-President ka BJP hapoh ka Jylla halor ka jingdon bynta jong u bad ka jingïai buddien ban pyntikna ïa ka jingrung jong nga sha ka seng hapoh ka jinglam lynti jong u National Vice-President ka BJP, u Chuba Ao,” u la ong.
Haba pynsngew halor ki jingïalap ilekshon ba la dep, u la ong ba u sngew dei ban ai khublei ïa ka ophis ka seng lem bad kiwei-kiwei ki dkhot jong ka BJP hapoh ka Jylla halor ka jingkyrshan ba ki la ai sha u ha ka por ilekshon.
“Nga kwah ban ai khublei ïa ki nongïalam ba rangbah jong ka seng kum Myntri Rangbah ka Assam, u Himanta Biswa Sarma, Myntri Sorkar Pdeng ba khmih ïa ki rit paid, u John Barla, Myntri ka Sorkar Jylla, Bah A.L. Hek, MLA bad Myntri barim, Bah Sanbor Shullai lem bad kiwei-kiwei haba ïadei bad ka jingkyrshan jong ki ban ïalap ilekshon na bynta jong nga ha ka konstitwensi ha kane ka ilekshon ba dang shu dep sha ka ïingdorbar thawaiñ ka Jylla,” u la ong.
