Mairang, Nailur 06
Ki jingsawa palat pud kiba mih na ki horn kali, ki bom pataka, ki tynghung pynsawa lane ki kor pynsawa, ka ktah shisha ïa ka bor ïohsngew bad ka koit ka khiah jong baroh, khamtam eh kum ha ki jaka sumar, ki jaka pule, ki ïingkashari lane kino kino ki jaka kiba la pynbna kum ki jaka ba jar jar (silence area/Zone) bad lada ym lah ban tehlakam kan wanrah jingthut ïa baroh ki nongshong shnong jong ka Eastern West Khasi Hills, District.
Ki jingsawa kim dei ban palat ïa kine ki jingthew kiba la buh, ha ki jaka ba don ki karkhana, mynsngi kan dei 75 dB, mynmiet 70 dB, ki jaka ïew mynsngi 65 dB, mynmiet 55 dB, ki jaka sah briew mynsngi 55 dB, mynmiet 45 dB, ki jaka ba jar-jar (Silence zone) mynsngi 50 dB, mynmiet 40dB.
Kumta, na ka bynta ka bha ka miat jong baroh bad khnang ban tehlakam ïa ka jingtem ne pynsawa palat pud ïa kino kino ki jait jingsawa, u District Magistrate, Eastern West Khasi Hills District, Mairang, Bah G Kharmawphlang, IAS, hapoh ka kyndon 144 CrPC, u la pynmih ïa ka hukum ban khang pyrshah ïa ka jingthang ïa ki bom pataka, ka jingai horn bad kino kino ki kor pynsawa palat ïa kitei ki jingthew kiba la kdew haneng.
Kane ka hukum kan treikam noh kumne kumne bad kan neh beit kumne tad haduh ban ba pynmih da kawei pat ka hukum.
Hynrei lada don kino kino kiba bym sngew ïahap halor kane ka hukum, ki lah ban wan ïakynduh ïa u District Magistrate.
