Shillong, Nailur 06
Ka Federation of Khasi Jaiñtia and Garo People (FKJGP) Malki Circle ka la ujor sha u Chief Executive Member (CEM) ka Khasi Hills Autonomous District Council (KHADC) halor ka jingdon jong ki briew kiba sah be-aiñ hapoh ka Ïewduh.
Ha ka shithi ujor ba la aiti sha u CEM, ka FKJGP ka la pynpaw ba ka la ïoh ban sakhi ïa ki jingdon katto katne ki trai dukan kiba la pynsah ïa ki nongtrei jong ki ha Ïewduh, ha kaba katkum ka jingtip jong ka seng ka long beaiñ ban sah miet ha ka ïew ka hat bad ha ki dukan jong ki.
Kumta halor kane ka bynta, ka seng ka kwah ba na ka liang jong ka Council ka dei ban shimkhia ïa kane ka kam khnang ban lait na kano kano ka jingjia kaba sngewsih bad ba sniew hadien habud bad ha ki pateng ban dang wan.
