Shillong, Nailur:
Kum ka jingïasnoh kti lang bad ka All India Primary Teachers’ Federation (AIPTF) ha ka Bharat Yatra, ki nonghikai skul Lower Primary ha Meghalaya hapoh kawei ka shatri jong ka All Meghalaya Primary School Teachers’ Association (AMPSTA) ki la ïaid kjat na ka bynta ban pynsngew ïa ki mat jingdawa kynthup ïa ka Old Pension Scheme (OPS) bad kiwei kiwei ki mat.
Ki nonghikai ki la sdang ban ïaid kjat na Community Hall Golflinks bad ki la ïaid ter ter sha Polo, bad kiew ka surok sha City Dhaba bad ïaid sha Shillong Club, Kashari, Raj Bhavan, Nanpolok bad poi biang sha kajuh ka jaka kaba ki ïalum ha Community Hall Golflinks. Da ki spah but ki nonghikai ki la ïashimbynta ha kane ka jingïaid kjat ha nongbah Shillong. Kum kane ka jingïaid kjat la pynlong ruh ha Tura.
Haba ai jingkren hadien ka jingïaid kjat hapdeng ka jingshit kyrang ka sngi, u General Secretary ka AMPSTA u Babu FC Shullai u la batai ïa ki mat jingdawa jong ka seng khamtam ka Old Pension Scheme kaba dei ban pynsngew sha ka Sorkar Pdeng nalor kiwei pat ki jingdawa kiba dang sahteng ban pynurlong da ka Sorkar Jylla.
Haba pynbna sha ki nonghikai, u Babu Shullai u la ïathuh ba ka jingpyllait ïa ka arrear kaba ïadei bad revised pay jong ki nonghikai skul LP (deficit) kaba sahteng 25% kan urlong shwa Khristmas mynta u snem.
U la ong ba ka pisa na ka bynta kane ka arrear kan kot sha ka T.22 klur na baroh 15 tylli ki SDSEO.
U Babu Shullai u la ïathuh ruh ba ïa ka arrear jong ka DA yn sa pyllait ha u snem mang tyngka ban sa wan.Haba ïadei bad ka jingpyllait ïa ka tulop, u la ong ba katkum ka jingbuddien bad ka ophis kaba dei halor ka pule puthi, ka tulop jong u Jylliew, Naitung bad Nailar la dep ban phah sha ki jaka kynshew pisa jong ki skul, bad ki secretary jong ki Managing Committee kin sa leh ïa ka donkam.
Shuh shuh u la ong ba lyngba ka AIPTF la pynkhie im biang ïa ka jingdawa ban pyntreikam ïa ka old pension scheme na ka bynta ka jingmyntoi ki nonghikai.
U la kren ruh shaphang ki mat kiba dei ban pynbha ïa ka pule puthi ha kaba ka Sorkar Jylla ka la thung ruh ïa u kum u dkhot ka State Education Commission bad ha ka por ba pynbeit ïa ka State Education Policy.
Ban pynïaid shakhmat ïa ka jingdawa, u Babu Shullai u la pynbna ïa ka jingleit ïashimbynta lang ki nonghikai na Meghalaya sha ka Bus Yatra ha Guwahati bad kane ka bos kan mih na Guwahati ban pynkut ïa ka jingïaid sha Delhi haduh ka 5 tarik Risaw, 2023.
