Shillong, Nailur 06
U Bah A.L Hek uba dei uwei na ki nongïalam bad MLA ka Bharatiya Janata Party (BJP) ha Meghalaya u la ong ba u ïahap shisha halor ki jingkynnoh ba ka daw jong ka jingbym kiew jong ka seng hapoh ka jylla, ka dei namar ba ka rukom treikam jong u President ka BJP Meghalaya u Bah Ernest Mawrie, ka long ban pynhun tang ïa la ki bahaïing bad ki paralok.
U Bah Hek, uba dei ruh u Myntri hapoh ka Sorkar Jylla, u la kubur halor ka jingkynthoh jong u nongïalam ka BJP bad MLA barim ka Mawsynram Bah Himalaya M Shangpliang ba u la shim ïa ka sienjam ban iehnoh kam na ka BJP namar ka jingtreikam pynhun bahaïing ne tang ki paralok da ki nongïalam ka seng hapoh ka jingïalam u Bah Ernest Mawrie kum President.
Haba kren sha ki lad pathai khubor, u Bah Hek u la ong, “Ka jingkren jong u Bah Shangpliang kam dei tang ka jingkren jong u, lada phi kylli na baroh ki nongïalam jong ka BJP hapoh Meghalaya naduh Garo Hills, Ri-Bhoi, West Khasi Hills, Shillong, kan don kajuh ka kyntien hi ba ka jingeh ka dei tang na ka daw jong u President, dei na kata ka daw ka seng kam lah ban kiew bad pynkhlaiñ ha Jylla Meghalaya”.
U Bah Hek u la pyntip ruh ba u Bah Himalaya Shangpliang ha shwa ban un iehnoh kam na ka BJP, u la wan ïakynduh ïa u ha ka Sngi Ba-ar bad ïathuh ïa kane ka rai kaba u la shim ban mih noh na ka BJP da kaba ai daw ba um lah shuh ban ïatreilang bad u Bah Ernest Mawrie kum u President.
Haba kylli halor ki sienjam ban weng noh ïa u Bah Ernest kum u President, u Bah Hek u la ong, ka por ka la kut hi ïa u ban bteng kum u President ka Meghalaya BJP bad ong ruh ba ka jingïoh ban bteng ïa kane ka kam, ka dei namar ba ki dang don ki Jylla ba don hapdeng ka ilekshon. Dei na kata ka daw ka seng kam pat ïoh ïa ka por ban shim ïa kano-kano ka rai.
