Shillong, Nailur:
Ka 5 tarik u Nailur jong man u snem la ju rakhe kum ka sngi burom ki nonghikai kum ka jingkynmaw ïa u synñiang u bynhei kaba ki nonghikai ki la noh sha ka imlang-sahlang.
Kum ban shu kdew hangne, kane ka dei ruh ka sngi ban kynmaw burom ïa ka lyngkhuh sngikha u Dr S. Radhakrishnan, u President barim ka India, uba dei ruh u nonghikai.
Ka Jylla ha ka Sngi Ba-ar ka la ïasnohkitlang bad ka ri baroh kawei ban rakhe ïa ka sngi burom ki nonghikai kaba 62 ha U Soso Tham Auditorium, Shillong ha ka jingdonlang u Myntri ka tnad pule-puthi ka Sorkar Jylla, u Rakkam A. Sangma kum u kongsan.
Haba ai jingkren ha ka jingïalang, u Sangma u la ong ba ka pule-puthi ka long uwei na ki rishot uba synñiang ha ka ban tei ïa ka ri.
U la ong ruh ba ki nonghikai ki don ïa ka bynta kaba kongsan ha ka ban pynurlong ïa ki thong da kaba pynwandur ïa ki khynnah ban long ki nongshong shnong kiba don ka jingkitkhlieh ha ka imlang-sahlang, kumjuh ban leh bha ha ka jingpule bad ban ïoh ïa ka jingshemphang khnang ban kynjoh ïa ka thong jong ka jingjop.
Haba kubur ba ki nonghikai ki mad ïa ki jingeh bapher-bapher kum ha ka liang ka jingsiew bad ka jingbym ïoh biang por ïa ka tulop, u Myntri u la ban biang halor ka jingminot ka Sorkar bad ki jingpyrshang ba ïai bteng ha ka ban khmih bad shimkhia ïa kine ki mat.
Ha kajuh ka por, u la ban jur halor ka jingdonkam ïa ki nonghikai ban wanrah ïa ki rukom hikai bathymmai na bynta ka bit ka biang bad ka bha ka miat jong ki khynnah.
Na ka liang u Myntri u la ai khublei ruh ïa u Madhav Singh, nonghikai saïan ba rangbah ka Alpha English Higher Secondary School, Nongpoh uba la ïoh pdiang ïa ka khusnam National Teacher Award, 2023.
Ha kane ka sngi, u Myntri u la plie ruh ïa ki projek kyrpang bapher-bapher hapoh ka SSA; ka ‘website’ jong ka Samagra Shiksha Abhiyan, ‘Adopt a School Campaign’ bad ka ‘PM e-Vidya Meghalaya’.
Shuh shuh ka Sorkar Jylla ka la pynkup burom ïa 13 ngut ki nonghikai na kylleng ka Jylla kum ka jingithuh ïa ki synñiang jong ki ha ka ban pynwandur ïa ka jingim jong ki khynnah.
Nalor ka khusnam ‘State Teachers’ Award’, la sam ruh ïa ka ‘District Award’ sha 36 ngut ki nonghikai na kylleng ka Jylla. Ha kane ka sngi la sam ruh ïa ki khusnam kyrpang ne ‘Special Prize’.
