Nongstoiñ, Nailur 07
Kumba 21 ngut ki bar Jylla kiba thmu ban leit trei ha ka Dhar kompeni kaba pyntrei ïa ka surok Nongstoiñ – Maweit ha West Khasi Hills ki la shah bat noh ha ki dkhot ka Khasi Students’ Union (KSU) Nongstoiñ Circle ha ka 7 tarik mynta u bnai.
U samla Pynkhraw Mawnai, Finance Secretary ka KSU Nongstoiñ Circle u la ong ba ka jingbat jong ka KSU ïa kitei bar Jylla kiba thmu leit trei ha ka Dhar kompeni ka dei hadien ba ki la pan ïa ki kot ki sla ha kaba ïadei bad katei ka jingwan trei jong ki sha katei ka jaka bad la lap ba kim don ïa ki kot ki sla kiba biang.
Nalor nangta, u la ong ruh ba ka KSU hadien ba ka la lap ba kitei bar Jylla kim don ïa ki kot ki sla kiba biang, ka la pynphai biang ïa kitei nongtrei bar jylla sha ka jaka ba ki wan namar ka jingpynkheiñ jong ki ïa ka Inter-state Migrants Workmen (Regulation of Employment and Condition of Service) Act 2011.
“Man ka por ka ju kyntu ïa ki paradoh ki parasnam ba ha shwa ban wan ïalam ïa ki bar jylla sha ka jaka ba pyntrei dei ban da pynbiang shwa ïa ki kot ki sla bad don ruh ka jingbah khlieh na ka bynta jong ki, ym dei ban ailad ban shu kamai beaiñ bad trei beaiñ, lada jia eiei mano ban bahkhlieh,” la ong u samla Pynkhraw.
U la ong ruh ba na ka liang jong ka KSU kan dang ïai bteng ban khynra shuh shuh ïa ki bar Jylla kiba wan trei beaiñ nangne shakhmat.
