Amlarem, Nailur 07
Ka War Jaiñtia Presbytery ka la buh ïa u maw nongrim ban tei ïa ka shlem treikam kaba pura ha Kynram Masi Pnu Amlarem, West Jaiñtia Hills District.
Ïa u mawnongrim la wan ban buh da u Moderator War Jaiñtia Presbytery, Rev. PRL Gadew ha ka jingsakhi lang ki nongïalam ka Presbytery, ki ’riew rangbah bad ki dkhot ka Building & Construction Committee ha ka Sngi Palei.
Shwa ka jingbuh mawnongrim, ka la don ka jingïalang lyngkot kaba la pynïaid da u T. Bn W. K. Lamin Chairman Building & Construction Committee bad la ïoh ka jingpule na ka ktien U Blei bad duwai na u Rev. W. Pohtam bad ki jingkren na u T. Bn SS. Suchiang Secretary Building & Construction Committee.
U T. Bn W. K. Lamin Chairman Building & Construction Committee u la ïathuh ba ka War Jaiñtia Presbytery ka dei kaba dang lung ka rta bad ka ïoh ïa la ka jong ka Presbytery dang ha u snem 2015.
U la ong haba la ïoh ïa la ka jong ka Presbytery, ki jingmut jingpyrkhat jong ki nongïalam ha kato ka por, ka long ban ïoh ïa la ka shlem treikam kaba pura na ka bynta ban kham pynbha shuh shuh ïa ka jingtreikam jong ka Presbytery.
Ka War Jaiñtia Presbytery ka la ïoh ïa ka jaka kaba heh 17,000 Square Feet bad kane ka urlong dei lyngba ka jingïalam lynti jong U Blei bad ka jingtrei borbah jong ki Balang hapoh ka Presbytery na ka bynta ban sei ïa ka bor pisa bad ruh ka jingdon jong ki ïa ka mynsiem jingieid bad jingkitkhlieh ïa ka kam.
Mynta pat ka por ka la dei ban jam sha uwei pat u mawjam kata ban pyrkhat noh ban sdang ïa ka ban pyntrei noh ïa ka shlem treikam jong ka Presbytery bad la mang ban tei ïa ka mala kaba hapoh ne Ground Floor bad hadien yn bteng sa lai mala shalor, la ong u Chairman Building & Construction Committee.
U la ong ruh kiba bun ki para bangeit ki don ha ka jinglynga pisa namar ka jingslem ban tei ïa ka shlem treikam jong ka Presbytery. Nalor nangta, u la ong haba peit ïa ka estimate ne jingkheiñ jong u snem 2020 ka jinglut ka kot sha ka 2 klur 98 lak 95 hajar tyngka, katba ka jingdon pisa jong ka Presbytery pat ka long tang khyndiat eh hynrei hapdeng ka jingkhyndiat ka Presbytery ka ïeng da ka jingshlur ban sdang ïa kane ka kam.
Kumta u la buh ka jingkyrpad ïa ki khun ka War Jaiñtia Presbytery kiba don ha ki lai tylli ki District; ka Thangbuli, War Mihngi bad War Sepngi District ba kin don sa shisien ïa ka jingkitkhlieh ïa kane ka kam da kaba kin kyrshan tyngeh ïa ka Presbytery khnang ban lah ban tei pyndep ïa ka la kumno-kumno hapoh ki lai snem eiei.
U Moderator War Jaiñtia Presbytery, Rev. P. R. L. Gadew ha ka jingkren u la ong, kane ka dei ka burom kaba khraw kaba U Blei u la leh ïa ka War Jaiñtia Presbytery bad ïa ki Balang baroh kiba don ha ka, namar ka dei lyngba ka jingai bad ka jingkyrkhu ka jong U ïa ki rympei ïing Khristan bad ka jingsbun mynsiem ki khun ka balang kaba la pynlong ïa ka Presbytery ba kan ïoh ban buh noh ïa u mawnongrim ban tei ïa ka shlem treikam kaba pura jong ka.
U la ong, ka lynti kaba ka Presbytery kan ïaid, kan dang long kaba kham eh shuh shuh hynrei ngin kynmaw pat ban buh ha ki jingduwai ba U Blei un ïarap ïa ki nongïalam bad ïa baroh ki dkhot jong ka War Jaintia Presbytery ba U Blei un pynïoh ha ki ïa kata ka jingmut jingpyrkhat kaba sngewkhia ïa ka kam bad don ka mynsiem noh synñiang katba lah synei na ka bynta ka kam kaba kyntang jong U Trai.
