Shillong, Nailur 07
U MP ka Congress uba dei ruh u nongïalam, u Sashi Tharoor u la ther ïa ka Sorkar NDA kaba ïalam da ka BJP da kaba ong ba kan bha ba jer noh da ka kyrteng BHARAT (Alliance for Betterment, Harmony And Responsible Advancement for Tomorrow) bad hangta ka seng kaba lamkhmat ïa ka jingsynshar kan sangeh ban pynkylla ïa ka kyrteng jong ka ri.
U Tharoor u la kren da kaba siat ïa ka BJP ba ka jingpyrshang ban pynkylla ïa ka ri na India sha Bharat ka dei tang namar ba ki seng saiñ pyrthei kiba don ha ka Liang Pyrshah ki la thaw ïa ka kynhun synrop kaba la ai kyrteng ka INDIA (Indian National Developmental Inclusive Alliance).
Ka kynhun INDIA kaba kynthup ïa ki seng saiñ pyrthei kiba bun kynthup ka Congress, bad kiwei, la thaw ban ïakhun ïa ka kynhun NDA kaba lamkhmat da ka BJP ha kane ka ilekshon MP ka ban sa long ha u snem 2024.
