Nongstoiñ, Nailur:
Ban kynmaw burom ïa ka sngi kha jong u Dr. Sarvepalli Radhakrishnan, u Vice President ba nyngkong duh ka Ri bad u President barim jong ka India, ka District School Education Officer West Khasi Hills, District Nongstoiñ, ha ka sngi Ba-ar ka la rakhe ïa ka ”Sngi Lehkmen Nonghikai kaba 62” ha Bishop Hall, New Nongstoiñ.
Kane ka jingrakhe ka long kum shi bynta ban pyrto ïa ka jingshakri bad ka jinglenlade jong ki nonghikai na ka bynta ban tei bad pynwandur ïa ka lawei jong ki khynnah kumjuh ruh na ka bynta ka bha ka miat ha ka imlang ka sahlang.
La sdang ïa kane ka prokram ha kane ka sngi, da ka jingkren pdiang na ka Kong D Hujon, SDSEO, Nongstoiñ ha ka jingdon ryngkat lang u RG Momin, MLA bad Chairman ka Meghalaya Mineral Development Corporation, Rambrai-Jyrngam Constituency kum u Kongsan, ka Kong L Syiemlieh, Rtd. DSEO, Nongstoiñ kum ka nongshah khot kyrpang, ki Principal, nonghikai ki khynnah skul bad kiwei kiwei kiba la wan pynshit pynshngaiñ ha kane ka sngi kyrpang jong ki nonghikai.
U Kongsan haba kren ha kane ka sngi u la ai ka jingïaroh ïa ka jinglah bad jingtrei shitom jong ki nonghikai ba ki long kum ki rishot jong ka imlang ka sahlang, ki nonghikai ki dei ki nongprat lynti na ka bynta ka lawei jong ki khynnah bad ka lawei jong ka ri bad ka jaidbynriew.
Ka kam nonghikai ka dei ka kam kyntang bad ka long shisha kaba eh bad kaba jwat khamtam eh ban hikai ha ki jaka kyndong jong ka distrik, hynrei namar ba ka kam hikai kam dei satia ka kam lum pisa hynrei ka dei ka kam kaba khot ïa ka jinglenlade, ka jingaiti bad ka jingtrei shitom.
U la kyntu ïa baroh ki nonghikai ba kin trei shitom khnang ban kyntiew ïa ka kam pule puthi hapoh ka distrik.
Shuh shuh u kongsan u la kyntu ruh ba ym tang ïa ki nonghikai, hynrei ïa ki khynnah ruh kumjuh bad ki khynnah ki dei ban lap miet ha ka ban trei shitom, pule minot bad ban don ka mynsiem jong ka jingsngewrit khnang ba ka lawei ka jong ki kan phyrnai.
Ha kane ka sngi ki nonghikai kaba mynta u snem (2023), la sakhi ruh ïa ka jingshah pynkup burom jong hynriew ngut ki nonghikai na ka bynta ka khusnam State Award 2023 bad District Award 2023, kaba kynthup ïa u Babu Sibsingh Ryntong, nonghikai jong ka New Nongstoiñ ‘B’ Govt, LP School na ka bynta ka khusnam, State Award 2023, katba u Babu Sylvester Syiemlieh, nonghikai jong ka St. Peter’s Higher Secondary School, Pyndengrei, (Secondary Level), Babu Bertila Dkhar, Headmistress Mawrang UP School (Upper Primary Level) bad Babu Celina Shangpliang, Head Teacher, Secret Heart RCLP School (Lower Primary Level) ki la ïoh pdiang ïa ka khusnam District Award 2023. Kumjuh ruh ïa u Babu Olbestar Kharsyntiew, nonghikai jong ka BPL Secondary School, Mawphetkhlam, u la ïoh pdiang ïa ka khusnam Best Scout Master katba u Babu Daria Iawren, nonghikai jong ka Sibsing Memorial Higher Secondary School, Nongpyndeng, la ïoh pdiang ïa ka khusnam Best Guide Captain.
La sam ïa kine ki khusnam sha ki nonghikai na ka bynta ki kam radbah kaba ki la leh ha kaba ïadei bad ka pule puthi jong ki khynnah hapoh jong ka distrik bad kiwei pat ki kam na ka bynta ban kyntiew ïa ka imlang ka sahlang.
La pynbyrngia ïa ka prokram ha kane ka sngi da ki jingrwai, ki jingïalehkai sawangka, ki skit, ka shad tynrai bad kiwei kiwei kaba la shimbynta da ki khynnah jong ki skul kiba pher napoh ka district.
