Nongpoh, Nailur 07
Ki pulit ka Ri Bhoi District lyngba ka Byrnihat Police Outpost ha ka janmiet jong ka Sngi Balang ki la ïoh ban kem noh ïa uwei u briew ba la suba shalan beaiñ ïa u drok heroin katba u dang thmu ban pynpoi ïa utei drok na ka nongbah Guwahati sha Shillong.
Kumba la ïoh lum jingtip na ki bor pulit, la ïathuh ba ki bor pulit ka thanat Byrnihat ki la ïoh jingtip nyngkong ha ka por 9:51 baje janmiet ba u don uwei u briew uba don ïa ka kyrteng Rahul uba thmu ban pynpoi ïa u drok ba la suba ba u dei u heroin.
Tang mar ïa ïoh jingtip, ki pulit ki la pynlong ïa ka jingapshrip bad dei tat haduh ka por 11:30 baje mynmiet ba la ïoh ban bat noh ïa kawei ka kali kamai kaba don ïa u number ML05-T-6149 kaba la pyndonkam da utei u briew ba la suba shalan drok.
Na ka liang ki pulit ki la pynlong ïa ka jingtohkit bad utei u briew ba la tip kyrteng kum u Rahul Narzary na ka shnong Happy Valley, East Khasi Hills District. Utei briew u la phla ba u la kit kumba shiphew tylli ki synduk sabon kiba la thep ïa u drok heroin. Kumta na ka liang ki pulit ki la talasi bad lap shisha ïa shiphew tylli ki synduk sabon ba la thep ïa utei u drok (heroin) na ka pla kieng jong u.
Shuh shuh ka tyllong khubor na ki pulit ka ïathuh ba ka jingkhia jong utei u drok heroin uba la ïoh kurup na ka met jong utei briew ka long kumba 135.64 gram bad u shongdor kumba T.1.3 klur eiei.
Halor kane ka jingjia, na ka liang ki pulit ki dang pynlong ïa ka jingtohkit kaba jur ban lap ksai shuh shuh ïa kiwei kiba donkti halor kane ka kam beaiñ bad ïa utei uba la ïoh kem ruh la pynngat ha ki kyndon aiñ jong ka Narcotic Drugs and Psychotropic Substances, 1985.
