Tura, Nailur 07
Ka Garo Students’ Union (GSU) Western Zone, Dadenggre ha ka Sngi Palei ka la ai jingkyrshan ïa ka jingdawa jong kito kiba la pyndep ïa ka MTET ha kane ka thaiñ ban thung kam mardor ïa ki, bad ha kajuh ka por, ka la buh jingkylli balei ka don ka jingpynslem ban thung kam nonghikai ha kane ka Civil Sub-Division.
“Ngi kwah ban tip lyngba u SDSEO balei ka don ka jingpynslem na ka liang ki bor ba dei khmih ban pynmih ïa ka byrta halor ka jingthung kam nonghikai. Ka jingsngap jar jong ngi ka mut ba ngi dang ai por ïa ka tnat ban jubab ïa ka jingkylli ha kaba ïadei bad kiba la pyndep MTET,” la ong ka GSU bad ka la byrngem ba kan ym shong kli kti shuh.
Nalorkata ka GSU ka la kdew ba kiwei pat ki jaka kum ka Tura, Baghmara, Ampati ha ka Rilum Khasi Jaiñtia, la pyndep ïa ka bynta banyngkong jong ka jingpynrung kam bad namarkata, ka la kylli balei la pynslem pat ha Dadenggre.
Ka GSU ka la dawa ba ïa ka bynta banyngkong jong ka jingpynrung kam dei ban leh da kaba thymmai ïa ka kynhun banyngkong (First Batch) jong kiba la pyndep MTET bad ka la kyntu ïa ki bor ba dei khmih ban leh ïa kaba donkam.
