Shillong, Nailur 07
U Myntri Rangbah ka Jylla, Conrad K Sangma u la leit ban ïakynduh ïa u Myntri Rangbah ka Telangana u K Chandrashekhar Rao ha ka Sngi Palei ha Pragathi Bhavan.
Ha kane ka sngi, na ka liang u Rao u la pdiang sngewbha ïa u Conrad, ha kaba la pynlong ruh ka jingïalang na ka bynta ban ïakren halor ka lad jong ka jinglah ban don ka jingïatreilang.
U Conrad uba la buh ïa ki dur bad jingpynpaw ka jong u ha ka rynsan social media, kata ha ka sla ‘Twitter’ bad ‘Facebook’ ka jong u, u la ong ba ka long shisha ka burom kaba khraw ban ïoh ïakynduh ïa u K Chandrashekar Rao ha kane ka jinghiar leit ïuhkjat ka jong u ha Telangana. Ha kane ka jingïakynduh la ïoh ban ïakren ban don ka jingïatreilang hapdeng ka Telangana bad ka Meghalaya.
U la ong ba ka Telangana ka dei kawei na ki jylla kaba wan hakhmat eh hapoh ka Ri bad kumta la kyrmen skhem ba ka jingïatreilang kan wanrah ka jingïadei kaba khraw, la ka long ha ka liang ka kam ka jam, bad ka IT development ka Meghalaya, bad ban pyni ruh ka nuksa ba kumno ka jylla kaba rit bad ka jylla kaba heh kin lah ban ïatreilang.
Ha kane ka jingïalang la ïadon lang ryngkat da ki kynrem ki lyndan ba kynthup ïa u Myntri KT Rama Rao, T Harish Rao, Errabelli Dayakar Rao, MLC Palla Rajeshwar Reddy bad Madhusudana Chari, u MLA Rohit Reddy, Planning Commission vice chairman B Vinod Kumar, u Myntri barim ka Sorkar Kmie Venugopala Chari bad u nongïalam ka BRS u Dasoju Sravan bad K Vamsidhar Rao nalor kiwei pat.
