Shillong, Nailur:
Ka put ka tem bad ki jingrwai ba la pynlong da ka Akashvani North Eastern Service, Shillong ka la pynkmen bad pynmuja shisha ïa ki paidbah kiba leit ban sngap bad pynbyrngia ïalade ha ka janmiet Sngi Balang ha U Soso Tham Auditorium.
Ïa kane ka tem ka put bad rwai la tip kum ka G20 Concert for Communal Harmony kaba la pynlong da ka Akashvani North Eastern Service, Shillong.
La ong ba kane ka tem ka put bad ka rwai ka siaw ka long ban wanrah lang hajuh ïa kiba bun ki nongtem nongrwai kaba la ai ka jingsngewtynnad bad jingïatylli lyngba ka bor jong ka jingrwai.
Ki ‘riew ieid ïa ka jingrwai bad ka tem ka put ki la poi lang ban rakhe ïa ka jingitynnad hapdeng ka jinglong kawei hapdeng ki jaitbynriew.
Ki jingrwai kiba la rwai ki don lang kiba pynpaw shaphang ka jingkylla ka suiñbneng, bad ka rukom tynrai ban pynim ïa ka mariang ha kaba la rwai da ki samla pule kiba pule ha Shillong kiba dei na Shillong ha Meghalaya, Arunachal Pradesh, Assam, Nagaland, Sikkim bad Tripura.
Ka army band ‘The Rhino boys’ kaba lamkhmat da u Priyo Kumar Singh bad ka band ‘2dB’ ba lamkhmat da u Felix Langstieh ki la tem bad pynshongshit ïa ki paidbah.
Kane ka tamasa tem ka put ka banjur haba ïadei bad ka bynta bakongsan jong ka put ka tem bad ki jingleh markylliang ban tehsong ban wanrah jingsuk, bad ban don ka jingsngewthuh naduh mynta haduh ki pateng ban sa wan.
Ha kane tamasa ka tem ka put la wan ruh ban sakhi lang da ki ophisar ka Assam Regimental Centre, Shillong nalor ka Kong RML Marbaniang, Head of Program Akashvani, Shillong.
Ïa kane tamasa ka tem ka put la pynwai noh da ka jingrwai ‘We are the World’ ba la rwai da u Bah Ferdinand A. Dkhar, Head of Programme NES bad Ferdinand Dkhar uba pynïaid ruh ïa kane ka tem ka put, kaba la pynshongshit shisha bad pynbynnud ïa ki paidbah kiba wan sakhi.
