Shillong, Nailur 07
U MLA barim ka Mawsynram konstitwensi, Bah HM Shangpliang u la pynthikna ba un rung noh sha ka NPP hadien ba u la mih noh na ka BJP.
Haba ïakren bad ki lad pathai khubor, u Bah HM Shangpliang u la pyntip ba un sa rung noh sha ka NPP ha ka 13 tarik mynta u bnai ha shlem treikam kane seng ha Shillong.
U la ïathuh ba ha ka 6 tarik mynta u bnai hadien ba u la phah shithi iehnoh kam, ki nongkitkam ka BJP Mawsynram Mandal ki la mih lang namar ha ka 12 tarik jong ujuh u bnai kin sa rung noh sha ka seng NPP ha kaba yn pdiang burom ïa ki ha Mawsynram.
Nalor nangta, u la ïathuh ruh ba hadien ba ki nongkitkam ki la dep rung ha ka 12 tarik mynta u bnai kin sa wan ban synranlang ban leit sakhi haba ma u, un rung noh sha ka seng NPP ha ka 13 tarik mynta u bnai.
U la pyntip ba hadien ba u la mih na ka BJP u la ïakynduh ïa u Bah Alvin Sawkmie uba dei MDC ba mynta ban shong jingïalang bad ki nongkitkam jong u kiba dang shu mih na ka BJP bad ki nongkitkam ka NPP.
U Bah Shangpliang u la jied ban rung sha ka NPP khlem da buh kyndon namar u kwah ban trei ïa kane ka seng kaba la shakri bha ïa ki paidbah ha kine ki san snem.
Halor ka jingmih khubor ban pan tiket ban ïakhun ïa ka ilekshon MP Lok Sabha um don jingtip eiei ïa kata, hynrei u rung sha kane ka seng namar ka jingtreikam bha hapoh ka jingïalam u Conrad K Sangma kum u Myntri Rangbah ka jylla ha kine ki san snem ban wanrah kam pynroi ïa ki paidbah.
“Ngi khlem ïakren eiei shaphang ka MP ilekshon namar ka jingrung jong nga sha ka seng NPP ban shakri ïa ki paidbah hadien ba u nongïalam ka BJP, Bah Ernest Mawrie um sngap ïa kaei kaba nga la ai jingmut ban trei na ka bynta ka seng lyngba ka BJP” u la ong.
Ha kajuh ka por u Bah Shangpliang u la phla ba dei u Conrad K Sangma uba dei u Myntri Rangbah ka jylla bad Bah Prestone Tynsong uba dei Symbud Myntri Rangbah kiba thung ïa u kum u nongaibuit ka tnad pule-dangle ka sorkar jylla.
Nalor kane, u la ïathuh ba u Bah A.L Hek kum u Myntri ha ka sorkar jylla u la dep thoh ïa ka kyrteng jong u bad Bah M Kharkrang ban phah sha u Myntri Rangbah ka jylla, u Conrad sangma ban thung kino-kino ki kam ha ki tnad sorkar bapher bapher, hynrei u Bah Mawrie uba dei u President ka BJP Meghalaya Unit u la phah pyndam noh.
U la ïathuh biang ba u Bah Hek u la kyndit ban ïohi ba u Bah HM Shangpliang u la shah thung kum u nongaibuit ha ka sorkar MDA bad u la ai khublei ïa u.
Shuh shuh u Bah Shangpliang u la pynpaw ka jingsngewsih namar u Bah Mawrie u phah tar noh ïa ka shithi kaba mut ban phah sha u Myntri Rangbah ka jylla namar u kynnoh ba kine ar ngut ki dei kiba dang shu wan thymmai namar u kwah ban mynjur ïa ka kyrteng jong u Bah Mawrie.
