Jowai, Nailur:
Ban ai mynsiem bad pynshlur ïa ki samla pule ba kin nang phyrnai bad tyngshaiñ ha ki jingpule kiba kham shalor, ka Thomas Jones Synod College, Jowai ka la pynkup burom ïa ki 220 ngut ki samla pule kiba la pyndep ïa ka kyrdan pule Graduate ha ka Bachelor of Arts (BA) bad Bachelor of Commerce (B.Com) ha ka jingrakhe ïa ka ‘Graduation Day’ ha phyllaw ka kolej ha ka sngi Balang.
Ïa ka jingïalang pynkup burom la pynïaid da ka C Bapui, Assistant Professor ha ka jingdonlang u kongsan u Rev. CL Laloo, Moderator KJP Synod Mihngi, u MDC JHADC u Bah Octomewot Lamin kum u symbud kongsan, ki nonghikai bad ki samla pule.
Shwa ka jingpynkup burom la ïoh ka jingkren pdiang na u Principal ka kolej u Dr. DG Lyngdoh bad ki jingduwai na u Tyrchain Mitre Lipon Assistant Professor bad na ka Sambha Phawa Assistant Professor.
U Rev. CL Laloo Moderator KJP Synod Mihngi ha ka jingkren u la ong, kane ka sngi ka dei ka sngi jong phi ki samla bad ka jingïadon ka jong ngi baroh hangne ka dei namar kane ka sngi ba kyrpang jong phi.
U la kren ai mynsiem ruh ïa ki da kaba ong ba ki la plie ïa ka jingkhang bah sha ka lawei kaba phyrnai ka jong ki bad u la kyntu ruh ban nangtrei shitom bad nangïai kiew shakhmat.
Nalor ki 220 ngut ki samla pule, la pynkup burom kyrpang ruh ïa ki 2 ngut ki College Toppers, 6 ngut ki Department Toppers bad 3 ngut ki toppers ha ka HSSLC Arts, Commerce bad Science stream.
Ki ar ngut ki samla pule kiba la ïoh ïa ka nam College Topper ki long ka Zamiaboanie Tariang na English Department ka la ïoh 69.13% bad ka Slubon Sutnga na Commerce Department ka la ïoh 70.13%.
Katba ki 6 ngut ki samla pule kiba la ïoh ïa ka nam Department Topper ki long na ka Khasi Department la ïoh da ka Phibayolin Shylla 66.25%, na ka History Department la ïoh da u Manbha Sungoh 60%, na ka Political Science la ïoh da u Maxweltar Rymbai 63.25%, na ka Education la ïoh da ka Pdianghun-i-ka Situng 64.5%, na Philosophy Department la ïoh da ka Lastica Suchiang 65.88% bad na ka Economic Department la ïoh da u Medonhi P Susngi.
Ha ka HSSLC, la pynkup burom ïa u Lalruotthar Pangamte uba la ïoh distinction ha ka sobjek Philosophy, ha ka Commerce stream la pynkup burom ïa u Giftstarborn W Pakem uba la ïoh distinction ha ka sobjek English, MIL Khasi, Accountancy, Bussiness bad ha ka Science Stream la pynkup burom ïa u Therlutimon Dkhar uba la ïoh distinction ha ka sobjek haka Khasi bad Biology ha katei ka kolej.
La pynphuh pynphieng ïa ka sngi kyrpang jong ki samla pule da ki jingrwai ba la ïa shim bynta da ki samla pule kane ka kolej.
