Shillong, Nailur 07
U Bah HM Shangpliang u la phla ba dei u Conrad K Sangma uba dei u Myntri Rangbah ka jylla bad Bah Prestone Tynsong uba dei Symbud Myntri Rangbah kiba thung ïa u kum u nongaibuit ha ka tnad pule-dangle ka sorkar jylla.
U la ïathuh ba u Bah Hek kum u Mmyntri ha ka sorkar jylla u la dep thoh ïa ka kyrteng jong u bad u Bah M Kharkrang uba dei u kyrtong ka BJP na North Shillong konstitwensi ban phah sha u Myntri Rangbah ka jylla u Conrad K Sangma ban thung kino-kino ki kam ha ki tnad sorkar bapher bapher, hynrei u Bah Mawrie uba dei u President ka BJP Meghalaya Unit u la phah pyndam noh.
U la ïathuh biang ba u Bah Hek u la kyndit ban ïohi ba u Bah HM Shangpliang u la shah thung kum u nongaibuit ha ka sorkar MDA.
Nalor kane, u Bah Shangpliang u la pynpaw ka jingsngewsih namar u Bah Mawrie u phah tar noh ïa ka shithi kaba mut ban phah sha u Myntri Rangbah ka jylla namar u kynnoh ba kine ar ngut ki dei kiba dang shu wan thymmai.
Nalor kata, u la phla ruh ba u Bah Mawrie u la phah thoh ïa ka kyrteng lajong ban phah sha u Myntri Rangbah ka jylla.
Shuh shuh u Bah Shangpliang u la ong ba ha kine ki sngi u la ju kyrpad ban phah ïa ka kyrteng jong ki saw ngut ki MLA kiba shah rem ban ïoh ki kam ha ki tnad bapher bapher jong ka sorkar jylla, hynrei ïa kane u shu ong tang da ka ktien pynban khlem pyni ïa ki kam.
