Shillong, Nailur 07
Ka Synjuk Waheh Shnong East Jaiñtia Hills District, ha ka Sngi Palei da ka jingsngewkhia kaba jur ha ka jingïalang jong ka Executive Committee, da kawei ka sur ka la rai ban pynrem jur halor ka jingnud jong u Waheh Shnong, ka Thangskai, East Jaiñtia Hills, ban ai syrnod nongshong shong bapura ïa uwei u bar jylla u bym dei satia u trai ri trai muluk na ka shnong Thangskai, kat haduh ba katei ka syrnod ka la ktah mynta wat ïa ka bhah pule doktor jong ki khun ka Bri U Hynñiewtrep.
“Ka jingleh jong utei u Waheh Shnong, ka shnong Thangskai, nalor ba ka la tuh ïa ka bhah pule doktor jong ki khun ka Bri U Hynñiewtrep, kane kan sa ktah ruh ïa ka jaitbynriew trai ri trai muluk ba rit paid jong ngi hadien habud. Kumta, ka SWS-East Jaiñtia Hills District, ka pynrem jur ïa kane ka jingleh jong utei u Waheh Shnong,” la ong u Hambertus Nongtdu, President ka SWS-EJHD.
U President ka synjuk, u la ong shuh shuh ba, ym tang kitei ki jingktah ïa ka jaitbynriew jong ngi, kat kum ba la kdew haneng, hynrei kane ka jingleh jong utei u Waheh Shnong, ka la wanrah ruh ïa ka jingjah burom bad ruh ka jingduh jingshaniah ïa kiwei pat ki Waheh Shnong jong ka East Jaiñtia Hills District. Kumta, ha ka jingïadei bad kane, lyngba une u kyrwoh, ka synjuk, ka la dawa jur ruh na ka Dorbar Shnong, Thangskai, bad ruh na ki bor sorkar kynthup na ka JHADC, ban pynduh pyndam noh shisyndon ïa katei ka syrnod jong utei u bar jylla.
U kyrwoh na ka synjuk, u la ong shuh shuh ba, halor ka jingmih jong katei ka kam bym lah ban pdiang na ka Shnong Thangskai, kaba buh pynban ïa ka Jaitbynriew ha ka jingeh bad ka jingma, ka SWS-EJHD, mynta hi ka sngi lyngba une hi u kyrwoh, ka la rai ban kyntu lane pynkynmaw ïa baroh ki Dorbar Shnong lane ki Waheh Shnong ha East Jaiñtia Hills District, ba ki dei ban long kiba husiar bha ha kaba ai ïa ki jait syrnod bapher bapher, khnang ba kane kan ym buh ïa ka ri bad ka jaitbynriew rit paid jong ngi ha ka jingeh hadien habud.
Ka SWS-EJHD, lyngba une u kyrwoh, ka la kyntu ruh ïa ki bor sorkar bad ruh ïa kiwei kiwei pat ki bor ba ki dei ban da bishar bniah bha ïa baroh ki syrnod na ki shnong ba la phah sha ki, bad ruh ban pyntip wut-wut sha ki Dorbar Shnong lada don kino-kino ki jait syrnod kiba ki i-shan-khmat.
“Ha kajuh ka por, ka synjuk, mynta hi ka sngi, na ka bynta ka ïap ka im jong ka ri bad ka jaibynriew ka la rai ba, lada long kaba lah, nangne shakhmat yn shna noh tang kawei ka dur ka dar (format) na ka bynta ki syrnod bapher bapher ïa kiba yn sa pyndonkam beit bad ryntih ha baroh ki shnong ha East Jaiñtia Hills District. Kat kum ba ka long mynta, kane ka kam ka dang don hapoh ka jingbishar bniah jong ka SWS-East Jaiñtia Hills District”, la pynkut u kyrwoh na ka SWS-East Jaintia Hills District.
Kane ka long katkum ka kyrwoh na u Hambertus Nongtdu uba long President ka SWS-East Jaiñtia Hills District.
