Shillong, Nailur 08
Ka Voice of the People Party (VPP) ka pyrshah jur haba ïadei bad ka jingthmu ban pynkylla kyrteng ïa ka ‘India’ sha ka ‘Bharat’ bad ban jur ba ym dei ban wanrah jingkylla ha ka Riti Synshar ka Ri namar ka long kum bym burom shuh ïa ki nongthaw jong ka.
“Ka kyntien ‘India’ bad Bharat ki don ha ka ‘Article’ banyngkong jong ka Riti Synshar ka Ri, hynrei lada khmih bniah, la kham pynleit jingmut ïa ka kyntien ‘India’ bad na kata ka daw ki buh nyngkong, hynrei kam mut pat ba ka kyntien ‘Bharat’ kam don,” la ong u nongaiktien ka VPP, Dr. Batskhem Myrboh ha ka Sngi Thohdieng.
Haba kdew ba kine ki kyntien ki ïa ïaid ryngkat, u la ong ba lada pyndonkam ha ka ktien phareng, la pyndonkam da ka kyntien ‘India’ katba ha ka ktien ‘Hindi’, la pyndonkam da ka kyntien ‘Bharat’.
“Ka jingsngew na ka liang ka seng ka long – ban klet noh ïa kawei bad ban pyndonkam tang da kawei…ngin klet noh ïa ka kyntien ‘India’ bad ngin pyndonkam noh tang da ka kyntien ‘Bharat’, kata nga sngew ba ka bym lah ban long bad ngi dei ruh ban pyrshah ïa kum kata ka jingleh,” la ong u Dr. Myrboh.
Halor ki nongpynwandur ïa ka Riti Synshar ka Ri bad ki dkhot ka ‘Constituent Assembly’, u nongaiktien ka seng u la ong ba haba ki (nongpynwandur bad dkhot) pyndonkam ïa kitei ki kyntien, ki da pyrkhat sani bad kum ka longdien ba mynta, ka dei ban burom ïa ka jingstad ki nongthaw jong ka Riti Synshar ka Ri.
“Kiwei-kiwei ki bynta jong ka India kum kiba Shathie, Mihngi, khamtam ki Jylla ki bym kren ïa ka ktien Hindi…ngi kham sngewtynnad hi ban pyndonkam da ka kyntien ‘India’. Haba ngi pyndonkam da ka kyntien ‘India’, ngi sngew ba ka dei ka ri jong ngi…lada phi pyndonkam da ka kyntien Bharat, ka lah ban wanrah ïa ka jingsngew ha ki briew ba ki duna ka jingïadei bad ka ri…bad kane kan ktah ïa ka jingsngew jong ki,” u la ong.
Na ka liang ka seng ka sngew ba ym dei shuh ban pynkylla kumba la thoh ha ka Riti Synshar ka Ri namar lada leh kumta ka mut bym burom shuh ïa ki nongthaw jong ka Riti Synshar ka Ri, u la ong.
Haba kylli, u la ong ba u ju sakhi ïa kita ki ’riewsaiñ pyrthei (Right Wing) kiba pyrshang ban wanrah ïa ki jingsngew bapher-bapher bad na kata ka daw ka don ka jingpynkylla kyrteng kat ïa ba don – ïa ka ‘All India Radio’ ruh ki ai ‘Akashvani’ kumjuh ki kyrteng skhim la bun da ki kyntien ‘Hindi’, ha kawei ka liang kaba wanrah ka jingbym sngewthuh hapdeng kito ki bym nang kren ïa kane ka ktien.
“Ïa kata ngim lah ban len ba ka BJP hi ka pyrshang ban wanrah nyngkong ïa ka ktien ‘Hindi’ ba kan long ka ktien salonsar ha India. Ngim lah hi ban len ba ki pyndonkam ïa ki jingsngew jong ki ‘Hindu’/‘Hindi’ ban ïoh ‘vote’, kane ka long kaba shai. Ngam tharai ba ki ruh kin kyntait ïa kata, ki ruh ki sngewthuh hi ba ki donkam ïa kata,” la bynrap u nongaiktien.
