Shillong, Nailur 08
Ki ar shaka ki la mih ban kamai ha kylleng ka nongbah Shillong, hynrei ka Sorkar kam pat lah ban ai jingkheiñ katno tylli ki ar shaka kiba la dep ban pynrung kyrteng.
Ki ar shaka khamtam ki scooty ki la mih ban kamai na ki jaka paidbah kum na Motphran, Khyndai Lad, Malki Point, bad kiwei kiwei ki jaka ban kit ïa ki nongleit nongwan kiba donkam kyrkieh ban poi sha ki jaka ba ki thmu ban leit khamtam namar ba jur eh ka dheng kali.
Haba kylli na ki bor ba dei khmih shaphang ki ar shaka kiba la ïoh permit ban kamai, kim pat lah ban ai jingkheiñ.
Ha ka jingshisha, ki ar shaka kiba kamai ki dei ban pynrung kyrteng bad kamai katkum ka Meghalaya Taxi Aggregator Operational Rules, 2020.
Ha ka jingshisha, ka Sorkar ka la dep buh dor ïa ka bai kali lada shong da ki ar shaka bad ka dor ka dei T.10 shi kilometre, bad lada shong tam sa shi kilometre, hap siew tam sa T.5 kaba mut ba lada shong 2 kilometre, ka dor ka long T.15.
Ka Kynhun Myntri ka la dep mynjur ïa ki ar shaka kiba ju kamai khlem siew khajna sha ka Sorkar ba kin kamai da kaba siew ïa ka bai laisen bad bai permit sha ka Sorkar, bad kine ki ar shaka kin ngat ha ka kyndon aiñ “Meghalaya Taxi Aggregator Operation Rules, 2020.”
Na ka bynta kawei ka ar shaka, u nongñiah un hap ban siew kum ka bai laisen kaba long T.700 shisnem, katba ka bai permit ka long T.200 shisnem lada ki kamai tang ha ki jaka kiba la batai lypa kum ha nongbah ne district, hynrei lada kamai ha baroh kawei ka Jylla, ka bai laisen ka long T.1300 bad ka bai permit ka long T.200.
Ka dor kaba dei ban oh lada shong da kine ki ar shaka ka long T.10 man ka 1 km. Yn kheiñ tam sa T.5 man lada shong tam ïa ka shi kilometre, bad lada kiba shong da ka ar shaka ki phah ap ïa u nongñiah, ka bai phah ap ka long T.4 tyngka man ka 5 minit.
Kine ki ar shaka kiba kamai ki dei ban don GPS, hap ban pynrung kyrteng bad ka tnat Transport, ban dei ban pyni kyrteng jong ki nongñiah na ka bynta ka jingshngaiñ ki nongshong ar shaka.
