Shillong, Nailur 08
Ka North Shillong konstitwensi kaba dei ka konstitwensi ba la jop da u kyrtong ka Voice of the People Party (VPP), Bah Adelbert Nongrum, hynrei haduh mynta ki nongkitkam jong ka VPP kim pat nud ban mih shakhmat ban pan tiket na ka seng VPP ban ïakhun ïa ka ilekshon MDC na Jaïaw bad Mawkhar-Pynthorumkhrah konstitwensi.
Katkum ka khubor ba la ïoh lum la ïathuh ba ka VPP North Shillong konstitwensi ka la lum jingïalang ïa ki nongkitkam mynta ka janmiet ban pynkhreh ïa ka ilekshon MDC. Pynban kat haduh mynta ym don tang uwei ruh ban pynpaw ba u kwah ban ïakhun ïa ka ilekshon MDC na kitei ar tylli konstitwensi kiba hap ha North Shillong.
Haba pyrshang ban ïakren bad u President ka VPP North Shillong kosntitwensi, Bah Strong Kharjana u la ïathuh ba haduh mynta ym pat don ki nongkitkam ka VPP ban pynpaw ba ki kwah ban ïakhun ïa ka ilekshon MDC na kitei ar tylli konstitwensi.
U la ïathuh ba ha Mawkhar-Pynthorumkhrah ki la don kiba la pynpaw, hynrei um pat ïoh jingtip kaba thikna namar ka VPP ka la don ïa ka election committee, katba ha Jaïaw konstitwensi ym pat don ba pynpaw haduh mynta.
Katkum ka khubor ba la ïoh lum la ïathuh ba la don uwei uba pan tiket na ka seng VPP na Mawkhar-Pynthorumkhrah uba dei ba shong ba sah ha Pynthorumkhrah.
Ki khubor kiba la ïoh lum la ïathuh ba ki nongkitkam ka VPP na North Shillong ki la dang ap ruh ïa ka rai jong u MLA ba mynta, Bah Adelbert Nongrum ban shim lang ïa ka rai.
Nalor kata, la ïoh jingtip ba ka VPP North Shillong kan sa shong jingïalang biang ha kine ki taïew ban pan ïa ka jingsngew na ki nongkitkam khnang ban ïoh ïa u kyrtong ban ïakhun na Jaïaw bad Mawkhar-Pynthorumkhrah konstitwensi.
