Shillong, Nailur 08
U nongaiktien ka Voice of the People Party (VPP), Dr. Batskhem Myrboh ha ka Sngi Thohdieng u la ong ba ka jingthmu jong ka Bharatiya Janata Party (BJP) ban wanrah ïa ‘Kawei ka Ri, Kawei ka Ilekshon’ (One Nation, One Election) ka lah ban dei na bynta ban ïohnong ha ki kam saiñ pyrthei.
“Lada phi peit ïa ka jingduna jong ka jinglut bad ka jinglah jong ka Sorkar ban pynleit jingmut ha ka kam synshar, te ngi ong ba ka sngew ïahap namar kum ha India, ngi ïohi ba la shu long ilekshon jan man ka shiteng snem bad nga ju mutdur ba kumno u Myntri Rangbahduh ka ri u synshar ïa ka ri haba nga ïohi ba bun na ka por kaba u pynlut ka dei ban leit ïalap ilekshon,” la ong u Dr. Myrboh.
Halor katei ka bynta, u la ong ba ka ktah shi kat dei ïa ka jinglong-jingman ka synshar-khadar da bun palat ki ilekshon namarba u Myntri Rangbahduh lem bad ki Myntri jong u ki bunkam tang ha ka ïalap ilekshon na kawei ka jaka sha kawei pat.
“Hynrei ka don pat ka jingeh ban pynlong ïa ka ‘Kawei ka ri, Kawei ka Ilekshon’, namarba da phi peit kumba ka long mynta, katkum ka Riti Synshar ka Ri jong ngi, ngim lah ban pynlong ïa kane namar katba ngi dang don hi ïa ka ilekshon shiteng samoi, u Myntri Rangbahduh ne u Myntri Rangbah ki don ha ka bor ban pynwai noh ïa ka ïingdorbar thawaiñ shuwa ban kut ka por jong ka, kaba mut ngin ym lah ban pynlong ïa kawei ka ilekshon,” u la ong.
U la ong ruh ba hap wanrah shuwa ïa ka jingkylla ha ka Riti Synshar ka Ri khnang ban lah pyntreikam ïa ka ‘One Nation, One Election’.
“Ka jingeh ka long ba lehse ka seng kum ka BJP ka wanrah ïa kane ka ilekshon ym na bynta ka jingbha hynrei ka lah ban dei na bynta ka jingïohnong ha ki kam saiñ pyrthei,” la ong u nongaiktien ka VPP.
U la kdew ruh ba ka rukom thep ‘vote’ ha ‘India’ ka ïapher haba ïa nujor ïa ka ilekshon MP bad ka ilekshon sha ka ïingdorbar thawaiñ ka Jylla.
U Dr. Myrboh u la ong ba kane lehse kan pynlong ïa ka BJP ban sngew ba lada don kawei ka ilekshon, lehse kan kham ïohnong namarba ïa kajuh ka mat, ki lah ban thaw ne wanrah ïa kajuh ka jingsngew lada ki briew ki thep ‘vote’ ha kajuh ka por.
“Nga tharai ki lah ban mutdur ba lada pynlong lang ïa ka ilekshon sha ka Parliament, sha ka ïingdorbar thawaiñ ka Jylla, kin lah ban ïoh kham bun ki Jylla ban synshar namar haduh mynta kim pat ïoh ïa ka jingbun paid ha Rajya Sabha. Kumta ki donkam eh ban ïoh thaw Sorkar ha kiba bun ki Jylla khnang ba kin ïoh synshar ïa ka Rajya Sabha,” u la ong.
Ha kajuh ka por, u la ong ba lada ki (BJP) ïoh bat ïa u lakam ha Rajya Sabha kan kham suk ïa ki ban wanrah kano-kano ka jingkylla kaba ki kwah ha ka ri.
Haba kdew ba ïa mynta ka liang pyrshah ka don ka jingbun paid ha Rajya Sabha, u la ong ba haba ki (BJP) donkam ban mynjur ïa ki ‘Bill’ kin hap leit khroh na ki seng rit ban ïoh ka jingkyrshan.
Shuh shuh u nongaiktien u la bynrap, “Lada wanrah pat ïa ka ‘One Nation, One Election’, ha ka jingsngew jong nga, ka BJP ka lah ban mutdur ba kan ïoh ban synshar ha kiba bun ki Jylla bad haba ka long kumne, ki lah ban phah ïa bun ki MP sha ka Rajya Sabha bad ki lah ban synshar syndon ïa ka Lok Sabha kumjuh ïa ka Rajya Sabha.”
