Shillong, Nailur:
Ïa ka lympung jingïalang jong ka North-Eastern Skill & Entrepreneurship Conclave, ba la tip kum ka ‘Manthan2023’ la plie da U Rajeev Chandrasekhar, Myntri khynnah ba peit ïa ka tnad Skill Development & Entrepreneurship bad Electronics and Information Technology, bad U Rajkumar Ranjan Singh, Myntri khynnah ka tnad State for Education bad External Affairs. Kane ka lympung ka la pynlong naduh ka 1 tarik haduh 3 tarik u Nailur ha Srimanta Sankardev Kalakshetra ha Guwahati, Assam, kane ka lympung ka long kum ka rynsan ban ïoh ïa ka jingïatreilang bad ka jingïawanlang ban pynïaid ïa ki kam kiba ïadei bad ka jingpynjanai ïa ki sap ki phong bad ka jingpynshlur ïa ki nongseng kam lajong ha ka thaiñ Shatei -lam -Mihngi ka ri India.
Ka jingthmu jong kane ka lympung ka long ban lum lang ïa baroh ki tnad bad ki shnat ba ïadon bynta ha kane ka liang, kynthup naduh ki Myntri sorkar, ka sorkar jylla, ki stad ha ka thoh ka tar, ki kynhun kiba mih khmat ïa ki karkhana, ki jaka pule, ki nongthaw aiñ, ki tnad Corporation, bad ki nongïoh myntoi, ba kin ïoh ban ïakren bad ïaphylliew jingmut ha kaba ïadei bad ki sap ki phong bad kumno ban kyntiew ïa ka seng kam-seng jam ha ka thaiñ Shatei -lam -Mihngi. Shuh shuh ka jingthmu jong kane ka long ban ïoh ban ïathir ïatai halor ki mat ba kongsan: (1) Ban sam jingtip bad pynsngewthuh shaphang ka thong ne ka jingïohi jngai jong ka Ministry of Skill Development & Entrepreneurship (MSDE) na ka bynta ka thaiñ Shatei -lam -Mihngi, la ban jur ruh halor kumno ban kyntiew ïa ka seng kam-seng jam bad ban nang kham pynbha shuh shuh ïa ki sap ki phong bad ha kajuh ka por ban pynkhlaiñ ïa kane ka bynta ha baroh ki liang (2) Ban ïakren shaphang ki jingmyntoi jong ka bhah ba kyrpang jong ka MSDE na ka bynta ka thaiñ Shatei- lam- Mihngi (3) Ban nang pynkhlaiñ shuh shuh ïa ka jingïatreilang lang ha ka thaiñ, ban wan rah ïa ki lad bad treikam katkum ki buit bathymmai, bad ban prat lynti ruh na ka bynta ban nang kyntiew shuh shuh ïa ka seng-kam seng jam bad ka jingpynjanai ïa ka sap-ka phong jong ki briew ha ka thaiñ Shatei -lam -Mihngi.
Ha kane ka lympung la kren shaphang ka jingtreikam ba radbah jong ka MSDE na ka bynta ki kam bad kiba ïadei bad ka jingkyntiew ïa ki sap ki phong bad ka seng kam-seng jam, da kaba kham phai khmat khamtam ha ka liang ban pynkup bor ïa ki samla jong ka thaiñ lyngba kine ki thup treikam ba ïahap bad kane ka liang. Shuh shuh, la kren ruh shaphang ki bynta kiba ïar ha kaba ïadie bad ka seng kam-seng jam, kaba kynthup naduh ka jingkyrshan pisa, ka jingplie lad plie lynti ïa ki lad kamai-kajih, bad ka jingmih jong ki kam-ki jam kiba dang seng thymmai ha ka thaiñ Shatei -lam -Mihngi, da kaba buh ïa ka thong ban wan rah ïa ka jingïatreilang bad ka jingïasnohkti hapdeng kiba ïadon bynta ha ka kam khnang ba ka jingseng kam-seng jam ka long kaba skhem.
Ha ka sngi ba nyngkong jong ka lympung jingïalang, ka MSDE ka la pyllait paidbah ïa ki lai tylli ki Skill Training Program ne ki prokram ai jinghikai ban nang pyntbit shuh shuh ïa ka kam ha ka liang ka jingshna ïa ki kali ilectric kiba sniew, ban ai jinghikai ïa ki briew kumno ban long ki nongpyndait ïa ki Solar Panel, kum shi bynta jong ka jingïatreilang hapdeng ka Indian Institute of Entrepreneurship (IIE) bad IIT Guwahati.
Haba shim kyllum lang, ka lympung jingïalang jong ka Manthan Conclave ka pyni ïa ka jingtreikam ban kyntiew ïa ki sap-ki phong bad pynshlur ïa ka seng kam-seng jam lajong ha ka thaiñ Shatei -lam -Mihngi jong ka India lyngba ka jingïatreilang, ka jingïasam jingtip, bad ka jingwad ïa ki lad ki lynti kumno ban ïoh ïa ki buit treikam thymmai.
