Shillong, Nailur 08
Kum shibynta ban ai ka jingshakri ïa ki paidbah nongleit nongwan sha ki jaka kiba ki thmu ban leit la ka long hajan lane sha jngai, uwei na ki ’riew rangbah ka jylla ïa uba la tip kyrteng kum u Bah Donboklang Dohling u la sdang ïa ka kam shakri paidbah kaba la ai kyrteng kum ka Designated Driver Shillong ka ban ai jingshakri ïa ki paidbah da kaba wan shaw ïa ki na ki jaka kiba ki don bad leit buh sha ki jaka kiba ki thmu ban leit kiba donkam ïa ki nongñiah kali.
Ha katei ka sngi la plie paidbah ïa katei ka Designated Driver Shillong da u Myntri ka sorkar jylla, u Bah Alexander Laloo Hek ha ka 8 tarik mynta u bnai ha Shillong Press Club.
Haba kren sha ki lad pathai khubor, u Bah Donboklang Dohling uba dei u Proprietor & Chief of Operations Designated Driver Shillong, u la ïathuh ba ïa katei ka Designated Driver Shillong ka dei ba la peitngor ruh da ka tnad pulit bad ki bor synshar distrik khnang ba ki nongñiah kali kiba la ithuh kin pyntikna ba ki nongleit jingleit kin don hapdeng ka jingshngaiñ ha ka leit ka wan.
Na ka liang u Bah Hek u la ai khublei ïa u Bah Donboklang uba la wanrah ïa katei ka lad kamai ka ban ai jingïarap ïa ki samla ha ka ïoh kam ïoh jam khamtam lei lei ha kane ka por kaba mynta ba kyrduh kam kyrduh jam.
“Ka sorkar kam lah ban ai kam ïa baroh, kumta ka long kaba donkam ban don kum kine ki lad ai kam ai jam bad kum ki briew kiba long kum u Bah Donboklang ki ban thaw ïa shibun tylli ki lad ai kam ai jam”, la ong u Bah Hek.
U Bah Hek u la ong ba kane ka lad jingshakri paidbah kan ai jingïarap shikatdei eh ïa ki paidbah ym tang ïa kiba sah ha Shillong hynrei kiba sah kham pajih na sor ruh kumjuh.
U Bah Donboklang u la ong ba katei ka Professional Designated Driver Services kan pynbiang ïa ki nongñiah kali bad kitei ki nongñiah kali kin leit sha ki jaka kiba ki paidbah ki don.
Katei ka Designated Driver Shillong kan treikam baroh 24 kynta bad ki paidbah ki lah ban phone ha une u nombar 923341541 bad ka dor ka long T. 600 ha ka jingjngai kaba 8 kilomitar.
