Shillong, Nailur 08
Ki longkmie ka BJP ha Meghalaya ki la sangah ïa u Bah Himalaya Muktan Shangpliang uba la kynnoh khlem nongrim ïa u President ka BJP ha Jylla, u Bah Ernest Mawrie bad ki la ong ba une u briew u dei uba la mlien ban kynnoh ha ka por ba u phet noh na ki ar tylli ki seng saiñ pyrthei tang hapoh shisnem tang na ka bynta ka jingmyntoi saiñ hima jong u shimet, bad kam kut satia ïa u ban wad ïa ki jaka plang ba jyrngam.
Ha u kyrwoh ba pyllait ha ka sngi Thohdieng, ka BJP Mahila Morcha ka la thalaiñ kylla ïa u Bah Muktan bad kynnoh ba ka jingkynnoh jong u ïa u Bah Mawrie ka dei tang ban aidaw ïa ka jingphet jong u na ka BJP da kaba kynnoh ïa kiwei pat.
Ka BJP Mahila Morcha ka la ong ba une u briew u la leh kumjuh ban wanrah ki jingkynnoh ha ka por ba u phet noh na ki ar tylli ki seng saiñ pyrthei ha u snem ba la dep na ka bynta ki jingmyntoi jong u shimet ha ka saiñ hima bad ka jingkwah jong u ban wad ïa ki jaka plang ba jyrngam kam kut satia.
Halor ka jingthung ïa ka Kong Susuki Pariat kum ka President ka BJP State Mahila Morcha bad ïa ka State Mahila Morcha Executive Committee la thaw da kaba ïasyllok lang kumba la pynkupbor katkum ka riti treikam ka BJP ym kumba la kynnoh u Bah Muktan ba ka dei kaba la leh hi da u President Bah Ernest Mawrie.
Ka President ka BJP State Mahila Morcha, ka Kong Susuki Pariat, ka la pynshai ruh ba ki don lai ngut ki General Secretary kiba la thung katkum ki kyndon ha kaba ïa ka Kong Dakaniwan Shullai la thung kum ka General Secretary kaba kham hakhmat, ka Kong Matilda Kharbuki bad Kong Grace Lanong la bynshet ba kin ïarap lang ïa ka General Secretary kaba kham hakhmat.
La ong ruh ba ka Kong Matilda Kharbuki kum ka General Secretary ka Mahila Morcha, ka dei ruh ka dkhot kaba la rim bha kaba la rung sha ka BJP naduh ka por ki President barim kum ha ka por jong Bah Khlur Sing Lyngdoh, ha kaba ka la bat kam kum ka Vice President ka State Mahila Morcha, General Secretary bad kum ka Treasurer ha ka por jong u President barim Bah Shibun Lyngdoh.
Kine ki longkmie ka BJP ki la kyntait ïa ka jingkynnoh u Bah Muktan ba u President Bah Ernest Mawrie u la pyndonkam ïa ka bor ban shu jied briew bad thung briew na ïing lajong (nepotism) da kaba ong ba kine ki jingkynnoh jong u ki dei kiba khlem nongrim bad ki buit ban ïoh shim kabu.
Shuh shuh ki la ong ba ka BJP kam dei kaba shu leh na bynta ka saiñ hima, hynrei na ka bynta ki kam pynroi bad ban don ka suk ka saiñ.
