Tura, Nailur 08
Uwei u Lot Mondol uba trei ha Land Records Branch jong ka GHADC u la shah ujor ejahar halor ka jingkynnoh ba u la ai ïa ka kot jaka ba be-aiñ sha uwei u Idris Ali haba ïadei bad ka jaka kaba long trai da 3 ngut ki briew ha ka shnong Asikandi, West Garo Hills.
Ïa katei ejahar la ujor da u Nurul Islam, uwei na ki trai jaka pyrshah ïa u nongtrei ka GHADC, u Rashidur Islam ha thanat Phulbari. Katba 2 ngut kiwei pat ki trai jaka ki kynthup ïa u Aziar Rahman bad ka Asma Bibi, kiba na ka shnong Asikandi.
Katkum ka jingïathuh u Islam, la ai ïa kawei ka kot jaka be-aiñ ha ka kyrteng u Idris Ali sha u Rashidur Islam haba ïadei bad ka jaka kaba long trai da ma u bad 2 ngut kiwei pat. U Islam u la kam ba katei ka ‘patta’ be-aiñ la ai ha ryngkat ka ‘Sale Deed’ kaba thok ba la thoh ha ka ktien Bengali ha u Lber, 1982.
Ha ka ejahar, u Islam u la kdew ïa katto-katne ki daw balei ba katei ka ‘Sale Deed’ kam long kaba shisha.
“Ïa katei ka ‘Sale Deed’ la thoh da u (L) Mozial Hoque Master. Hynrei u pyrsa kurim jong u – Baharul Ulam Sarkar u la kyntait ha ka jingïalang ba dang shen ha ka Panchayat ba ka jingsoi ha ka ‘Sale Deed’ kam ïasyrïem bad jong u kpa jong u. Sa kawei ka long ba ïa katei ka ‘Sale Deed’ la thoh ha ka kot ‘A4’ ka bym pat shym la don ha u snem 1982,” ong u Islam.
U Islam u la kdew ruh ba katkum ka ID thep ‘vote’ jong u, u Idris Ali, uba la dep thied ïa ka jaka na u kpa jong u un dang don dang 13 snem ka rta ha u snem 1982, (u dang hapoh 18 snem ka rta bad um pat lah ban thied jaka). U Islam u la kam ruh ba ki don ki kot ki sla kiba pyni ba u kpa jong u, u la thied ïa katei ka jaka ha u snem 1986 bad buh jingkylli kumno la die sha u Idris Ali ha u snem 1982, 4 snem hashuwa.
Na ka liang ki nongshong shnong ka Phulbari bad Bhaitbari dang shen ki la pyrshah ïa jingwan shimti jong u Rashidur Islam kum u Lot Mondol na bynta katei ka thaiñ halor ka jingkynnoh ba la ju bna ïa u ba u donkti ha ki kam be-aiñ. Ïa ka jingujor la phah sha u Deputy CEM ka GHADC, u Nikman Ch Marak, bad ka la mih ruh ha ki lad pathai khubor.
