Shillong, Nailur 08
Ka por ka la jan poi artad ban bujli noh ïa ki ‘bearing’ kiba la pyndait ha ka jingkieng ïaid kali kaba la shna halor ka jaka ba den ïa ka pung Umïam, bad ka Sorkar mynta ka dang ap sa ïa ka kaiphod kaba pura na ka Indian Institute of Technology (IIT) Guwahati ka ban batai shai haba ïadei bad ka jinglong jingman jong kane ka jingkieng.
Haba ïakren bad u Myntri ka tnat bording ka Jylla, u AT Mondal u la ïathuh ba katkum ka kaiphod kaba malu-mala kaba la ïoh ha ka por ba leit peit bniah ïa kane ka jingtei baroh kawei, la lap ba ka jingkieng bad ka jingtei kaba den ïa ka pung Umïam ka long kaba biang bad ym don jingma, hynrei kaba donkam ka long tang ban bujli thymmai noh ïa ki ‘bearing’ kiba pyndait ban ïakyrshut hapdeng ka jingkieng bad ka bynta ba den ïa ka pung Umïam.
U Mondal u la ong ba mynta dang ap ban ïohpdiang ïa ka kaiphod kaba pura hadien ka jingleit jurip ka IIT Guwahati ïa kane ka jingtei khamtam ka jingkieng kaba ïaid nalor jong ka bynta ba den ïa ka pung Umïam.
U la ïathuh ba kaba tikna ban hap leh noh ka dei ka jingbujli ïa ki ‘bearing’ ha kaba la dep ruh ban phah sha ka kompani kaba shna ïa ki bearing ban pynpoi noh.
Haba kylli lano ka kam kan sdang noh ban bujli ïa ki bearing, u Mondal u la ong ba ym slem shuh ban leh ïa kane, tangba ym pat lah ban leh mynta u snem.
U la ong ba kat ïa kane ka kam kaba eh bad kaba donkam ban da leh sani, hap ban pynbit pynbiang ïa ki jingdonkam baroh hashwa ban sdang ïa ka kam khamtam namar ba hap ban rah ïa ka jingkieng shalor ban thep thymmai ïa ki bearing.
Nalor nangta, u la ong ba haba leh ïa kane, donkam ban khang ïa ki kali ban ïaid bad ka donkam bun kynta ym duna ïa ka 8 kynta ban khang ïaid ïa ki kali, bad ynda la biang lut ki jingpynkhreh yn sa buh sngi ban trei ïa ka kam.
U la ong ba ki kali rit kiba sting lehse kan nym da ktah than lada ki ïaid hadien ka 8 kynta ynda la dep pyndait bujli ïa ki bearing.
U la pyntip ruh ba na ka liang ki karikor (engineer) ka MeECL bad ka PWD ki la dep thaw ïa ka joint committee ban khmih bniah ïa ka rukom pyntrei ban pyndait thymmai ban bujli ïa ki bearing ha kane ka jingkieng.
Baroh shikatta, ka la don ka jingïatai khah-khah haba ïadei bad ka jaka ba den ïa ka pung Umïam bad kam long shuh kaba shngaiñ ban ïaid ki kali kiba kit palat pud namar ka buh jingma ïa kane ka jingkieng bad ka jingtei kaba den ïa ka dam.
