Shillong, Nailur 10
Ki paidbah ka Jylla kiba dei ki nongïoh myntoi na ka skhim bylla shispah sngi kaba tip kum ka Mahatma Gandhi National Rural Employment Guarantee Act (MGNREGA) ki dei ban ïoh bylla haduh 300 lak sngi katkum ka jingmang pisa na ka bynta kane ka skhim ha u snem 2023-2024.
Ka jingmang pisa kaba la dep mynjur na ka bynta ka Meghalaya lyngba ka MGNREGA ka dei na ka bynta 300 lak sngi. Katkum kane ka skhim, ka jingtrei bylla sngi ka dei ban long 100 sngi shisnem.
Na ka bynta 300 lak sngi, ka pisa baroh ka dei ban kot sha ka T.1190 klur, ha kaba T. 714 klur ka dei na ka bynta ka bai trei bylla sngi, katba T.476 klur na ka bynta ka bai thied ïa ki tiar ki tar kiba pyndonkam haba pyntrei ïa kane ka skhim.
La ong ba ka Jylla Meghalaya ka lah ruh ban kham kiew shuh shuh ha ka jingbylla sngi bad ka shong eh ha ki Village Employment Council (VEC) kiba dei ban phah ïa ki jingtyrwa ban pyntrei ïa ki projek bapher bapher.
Dang shen, ka Sorkar Pdeng ka la dep mang kumba T.301 klur na ka bynta ka bai thied tiar ban pyntrei ïa ka skhim bylla sngi ha Meghalaya ha kaba ka bai thied tiar kaba sah jong u snem 2021-22 yn pynkhuid lut noh, katba jong u snem 2022-23 yn pynkhuid tang 40%.
Kane ka pisa kaba la mang ka dei lang na ka bynta ka bai thied tiar kaba sahteng jong u snem 2021-2022 kumba T.89.11 klur.
Ka bai thied tiar jong u snem 2022-2023 ka dang lait shwa tang 40% kata, kumba T.197.83 klur.
Ka pisa baroh kaba dei ka bai thied tiar jong u snem 2022-23 ka la kot sha ka T.486 klur.
Shuh shuh la ong ba na kane ka T.301 klur kaba la mang, la buh lang na ka bynta ka tulop jong ki Technical Assistant.
Ka jingmang pisa ïa ka Jylla baroh kawei ka long 90 na ka Sorkar Pdeng, bad 10 na ka Sorkar Jylla, bad jingmang ïa ka bai tiar, ka long 75 na ka Sorkar Pdeng bad 25 na ka Sorkar Jylla.
La ong ba haduh mynta, ka Sorkar Pdeng kam pat pyllait thymmai biang ïa ka pisa bad na ka liang ka tnat Community and Rural Development ka dang ap ban pyllait ïa ka pisa kaba dei ban bei da ka Sorkar Jylla.
Hadien ba la ïoh ïa ka pisa kaba dei ban bei lang da ka Sorkar Jylla, ka tnat ba dei khmih kan sa phah thymmai ïa ki jingtyrwa sha ka Ministry of Rural Development jong ka Sorkar Pdeng.
Ka Sorkar Jylla ka ju ïoh tista ïa ka jingmang pisa na ka bynta ka bai bylla kaba pyllait da ka Ministry of Rural Development.
