Jowai, Nailur 10
Ka Jaiñtia Coordination Committee on Reservation Policy (JCCRP) ka la rai ban thaw da ka Core Committee na bynta ban ïakren sani bha ïa ka bhah thung kam thung kaba thymmai ha ka Jylla.
Ïa katei ka rai la shim ha ka jingïalang ka Dorbar Ki Khon Ka Ri Jaiñtia kaba long ha ka 9 tarik Nailur ha Ladthadlaboh Indoor Hall.
Ha katei ka jingïalang la ïadonlang u Prof. P.M. Passah, Advocate Erwin Sutnga, Bah Garlan Rymbai, President barim ka JSU, Bah D. Pde u nongïalam shnong ba mihkhmat ïa ka Synjuk ki Waheh Chnong Jowai bad kiwei-kiwei nalor ki kynhun seng ba kynthup ïa ka JSU, JYF, JNC bad kiwei.
U Chairman ka JCCRP, u samla Jersom Shylla u la ong da kawei ka sur ha kane ka jingïalang baroh ki nongkren ki la pynpaw ba ka Sorkar lyngba ka ‘Expert Committee’ kam dei ban shim por haduh shi snem ban pyndep ïa ka kaiphod lane ban khmih bniah ïa ka ‘Reservation Policy’ hynrei ka dei ban kham pynkloi namar ïoh ka long tang kum ka buit ba ka Sorkar kan buhteng bad ban pynslem kai ïa ka por ban khmih biang ïa ka bhah thung kam thung jam.
Ha katei ka Core Committee halor ka ‘Reservation Policy’ yn kynthup lang ïa ki ’riewstad, ’riewshemphang ryngkat ki nongïalam jong ki kynhun seng ban shong pyrkhat halor kane ka kam, la ong u Jersom uba long ruh u President ka JSU.
