Nongstoiñ, Nailur 10
Ka Ri Khasi Sepngi Federation (RKSF) ka la pynpaw ïa ka jingsngewkhia kaba jur ha kaba ïadei bad ka jingjia kaba la jia ha Thangskia, East Jaiñtia Hills halor ka jingpynsngew paidbah ban pynïar ïa ka ‘Top Cement’ bad kdew ba kitei ki jingjia kin dang jia shuh nangne shakhmat lada ka Sorkar kan pyndonkam da ka ‘Land Lease’ ban ai wai ïa ki kompeni kiba heh hapoh ka Jylla.
U samla Mawkordor Kharsyiemlieh, President ka RKSF ha ka kyrwoh khubor ba la phah u la ong ba la ïohi ha kiba bun ki rynsan lad pathai ba ka la don ka jingkulmar kaba mih na kato ka jaka wat haduh ba la don ruh ka jingmynsaw.
“Ka jingailad ka Sorkar ïa kine ki kompeni da ki spah snem ba kin trei bad da ki hektar ka jaka kaba kin pyndonkam kan ktah ïa ki shnong ki thaw, ïa ki par dewïong, ki par mawshun bad kiwei-kiwei ha kaba ki paradoh parasnam jong ngi ki pyndonkam ban kamai bad kan poi ka por kumba la ong ki longshuwa ba ngin sa long tang ki nongtong um jongno-re-jongno namar kine ki kompeni kiba la pynïaid da ki barjylla kin shu klun lut ïa ki jaka ki puta bad ka spah ka phew ha ka Bri u Hynniewtrep,” la ong u samla Mawkordor.
U la ong ruh ba ka jingpyndonkam jong ka Sorkar ban ai ‘Land Lease’ sha ki kompeni ka kdew shai ïa ka jingpynkheiñ ïa ka aiñ Meghalaya Land Transfer Act 1972 kaba yn ym lah ban aiti ïa ka jaka da ki trai-ri sha ki bym dei trai-ri.
U samla Mawkordor u la ong ba ka RKSF ka maham lypa ba wat ai ba ha ka thaiñ West Khasi Hills ruh kan long ha kane ka rukom namar ka RKSF ka la kren shai ba kan ym ailad ban peitngor nangne shakhmat ban kan ym ailad ba kiwei pat ki jaidbynriew lane ki bar Jylla kin shu wan ban shim kabu.
Na ka liang u President u la ong ba ka RKSF ka dawa bad kyntu ïa ka Sorkar Jylla ba ka dei ban leh bha na ka bynta u paidbah ka Bri u Hynñiewtrep khnang ba ki paidbah kin ym duhnong hynrei kin ïoh ka kamai kajih kaba biang.
