Shillong, Nailur 10
Ka United Democratic Party (UDP) ka la sdang ban pynkhreh shaid-shaid ïa ka ilekshon MDC na ka bynta u snem 2024 namar ka la ailad ha ki jylli (Circle) treikam ba kin dang bishar noh ïa ki kyrtong kiba kwah ban pan tiket.
Haba ïakren bad u Bah Alantry Dkhar uba dei u Vice-President ka UDP, u la ïathuh ba ka seng ka la ai bor ha ki jylli ba kin dang bishar noh ïa ki kyrtong kiba thmu ban ïakhun ïa ka ilekshon MDC ha Khasi Hills Autonomous District Council (KHADC) bad Jaiñtia Hills Autonomous District (JHADC) ha u snem 2024.
U la ïathuh ba lada don ki konstitwensi kiba bun kiba pan tiket ki hap ban shong bishar bniah khnang ban phah sha ka District bad sha ka State Election Committee ban shim ïa ka rai kaba khatduh. Hynrei, lada ym don ba ïaknieh tiket, ka jylli (Circle) treikam ka hap phah beit tang kawei ka kyrteng.
Haba ïadei bad ka ilekshon MP Lok Sabha, u Bah Alan u la ong ba ka seng kam pat ïakren eiei namar ka kwah ban pynkhlaiñ shwa ïa ka ilekshon MDC ka ban long la shem snem (2024).
Halor ka ilekshon MP Lok Sabha, u la ïathuh ba ka seng kan sa ïakren ha kine ki bnai ban wan.
Halor ka Regional Democratic Alliance (RDA) hapdeng ka UDP bad HSPDP, u Bah Alan u la ïathuh ba ka RDA ka dei tang ka jingïasngewthuh jingmut hapdeng ka UDP bad ka HSPDP.
U la ïathuh ba kane ka jingïasngewthuh jingmut ka UDP bad HSPDP ha ka RDA ka long ha kane ka ilekshon MDC kin ïaid beit la ka jong, hynrei ka HSPDP kan nym pynïeng kyrtong ha jaka ba khlaiñ ka UDP bad ka UDP kan nym pynïeng kyrtong ha jaka ba khlaiñ ka HSPDP.
Kum ban shu pynkynmaw ba ka UDP bad HSPDP kim shym la pynkhlaiñ shuh ïa ka RDA hashwa ka ilekshon MLA ba dang shu dep, hynrei ki la pynkhlaiñ biang hadien ba la lut ka ilekshon hadien ba ka UDP kam shym la lah ban ïalam ïa ka sorkar riewlum.
Kat haduh mynta dei tang ka seng VPP kaba khlem shongthait ban pynkhreh ïa ka ilekshon MDC bad MP Lok Sabha ka ban long la shem snem, katba ka NPP bad UDP kiba don ha ka sorkar ki dang kynjah jar-jar.
