Shillong, Nailur 10
Ka Meghalaya College Teachers’ Association (MCTA) kan sa leit ïakynduh ïa u Vice-Chancellor (VC) ka North Eastern Hill University (NEHU), u Prof. P.S. Shukla ha ka Lah Sngi U Blei ban ïakren halor ka National Education Policy, 2020 (NEP-2020).
“Ka MCTA ha ka 21 tarik Naitung, 2023 ka la thoh sha u VC ka NEHU ban kyrpad pynbeit ïa ki mat ba hakhmat eh jong ka jingdawa ka seng haba ïadei bad ka NEP,” la ong u General Secretary ka MCTA, Dr. A.W. Rani ha ka kyrwoh khubor.
Ha kawei ka liang, u la pynpaw ka jingsngewkmen ban ïoh pdiang ïa ka jingkhot sngewbha na u VC ha ka 8 tarik Nailur,2023 ban ïakren halor ka mat jong ka NEP-2020.
Ha katei ka jingkhot sngewbha, u Dr. Rani u la ong ba wat la u VC u la kdew ïa ki jingmyntoi haba ïadei bad ka jingpyntreikam ïa ka NEP, hynrei ym shym la don kano-kano ka jingpdiang ïa ki jingtynjuh kiba paw.
“Wat la katta, ka MCTA kaba long la kloi bad minot ban trei na bynta ka bha ka miat jong ka pule-puthi ka kyrmen skhem ïa ka jingïakren kaba tei bad ba seisoh bad ka la rai ha ka jingïalang EEC ba kyrkieh jong ka ban pdiang ïa kane ka jingkhot sngewbha,” la ong u General Secretary.
Ka seng kumta ka la rai ban ïakynduh ïa u VC ha ka Lah Sngi U Blei, 11 tarik mynta u bnai, ban pynsngew bad pynbeit ïa ki jingsngewkhia jong ka kumba ka la pynpaw naduh ka 21 tarik u Naitung, 2023.
Kum ban shu kdew hangne, ka MCTA, kaba dei ka synjuk ki nonghikai kolej ha ka Jylla ka la shim ïa ka rai ban ym ïatreilang shuh bad ka skulbah North Eastern Hill University (NEHU) ha ka jingpynjari ïa ka National Education Policy-2020 ha ki kolej.
Ka dawbah jong katei ka rai ka long ba ka skulbah kam shym la bud ryntih ïa ka rukom treikam kumno ban pynjari ïa katei ka mat treikam.
Ha ka jingshisha, ïa ka jingpyntreikam ïa ka NEP, la dei ban wanrah shuwa ha ka ‘Academic Council’ (AC) kaba dei ka dorbar raikam jong ka NEHU hynrei kaba sngewsih ka long ba ym shym la don kano-kano ka rai halor katei ka bynta bad ha ka jingshisha ka AC ka la kdat sharud ïa ka mat la yn pyntreikam ne em ïa ka NEP ha ka Jylla naduh ka samoi pule 2023-24.
Halor katei, ka seng ka hukum ïa baroh ki dkhot jong ka ba kim dei ban shim ïa ki klas jong ka ‘First Semester’ ha baroh ki sobjek naduh ka 1 tarik Nailar, 2023 bad ki dkhot kim dei ruh ban shim kano-kano ka kam haba ïadei bad ka jingpyntreikam ïa ka NEP tat haduh ban da pynbna da kumwei pat.
Ka seng ha kajuh ka por ka la ban jur halor ka jingdawa ban phah weng mardor ïa ka shithi ba la pynmih ha ka 12 tarik Naitung, 2023.
Hashuwa, na ka liang u Prof. Shukla lyngba ka kyrwoh khubor u la khot ïakren ïa ka MCTA ban pynbeit ïa ki jingsngewkhia kiba ka seng ka don halor ka NEP-2020.
U Prof. Shukla haba kren halor ka jinglong-jingman ba kynthup ïa ka MCTA bad ka jingïakhih (Non-Cooperation Movement) jong ka seng, u la ong ba na bynta ka bha ka miat jong ki samla pule kiba saphriang ha kylleng ka Shatei Lam Mihngi, u la kyrpad ïa ka MCTA ban pyrkhat biang halor ka lynti ba ka seng ka la shim.
Nalor kane, u VC u la pynpaw ïa ka jinglong kloi ban ïadon bynta ha ka jingïamir jingmut kaba tei ban pynbeit ïa ki jingsngewkhia bad wer ruh ïa ka MCTA sha ka jingïakren ban poi sha ka rai ha ka lynti jong ka jingïabeit lang.
