Shillong, Nailur 10
Ka Voice of the People Party (VPP) ka la kren shai ba kan kham phai khmat sha ki ’riew thymmai ba kin long ki kyrtong jong ka seng ban ïa kito ki briew kiba la ïakhun teng ïa ka ilekshon na kiwei pat ki seng saiñ pyrthei.
“Kumba ngi ju ban ïa kata ba lada don makna kiba kum kita kiba la ïaleh ilekshon hi nawei te ngim ju da kham pynmlien…ngin ym ai mynsiem ïa ki ban long ki kyrtong jong ka seng,” la ong u nongaiktien ka VPP, Dr. Batskhem Myrboh haba kren sha katto-katne ki lad pathai khubor.
U la ong ba ka seng kan ïaleh hi ban wad da ki briew kiba dang thymmai bad kiba lah ban ïoh ïa ka jingshaniah na ki paidbah.
Haba jubab, u la ong, “Ngim kwah ban pynshlur ïa ki briew ban ïakynthih na kawei ka seng sha kawei pat. Ka jingpynmlien ban kynthih seng ha nga hi nga i kam long kaba bha lait noh sa tang lada don ki nongrim kiba biang bad ba skhem kaba pynlong ïa ki balei ban mih noh na ka seng.”
Ha kawei ka liang, u la pynsngew ba ka seng kam shym ong ba kan ym pdiang ïa ki briew kiba mih na kiwei pat ki seng hynrei kan bishar shuwa bin-pa-bin bad lada i shong hok ban pdiang, kan pdiang, lym kumta kan ym pdiang.
U Dr. Myrboh u ïathuh ba na ka liang ka seng ka la ïaid shaid-shaid haba ïadei bad ka jingpynkhreh na bynta ka ilekshon ban wan bad kumba ka long mynta, ka seng ka la leit ban pynrung dkhot sha kylleng ki jaka jong ka Jylla, kum shi bynta ban pynkhreh ïa ka ilekshon MDC kumjuh ïa ka MP.
“Ngi la nang ïa wad ïa ki kyrtong, ngi la pdiang ïa ki aplikeshon jong kito kiba tyrwa ban long ki kyrtong na ka seng. Ngi la pynkhreh shaid-shaid bad ngi khmih lynti ba nangne shakhmat ngi lah ban ithuh noh mano ba lah ban dei kita ki kyrtong jong ka seng na bynta ka ilekshon MDC (KHADC/JHADC),” u la ong.
Haba kylli halor ka rukom pan tiket, u la ong ba kane baroh ka shong ha ki konstitwensi – don ki konstitwensi kiba bun, don kiba khyndiat.
“Ngin pynïeng kyrtong na baroh ki konstitwensi ha Ri-lum Khasi-Jaiñtia ha kane ka ilekshon MDC ban wan,” la pyntikna u nongaiktien.
Haba phai sha ka ilekshon MP kaba ka VPP ka la dep pynbna ïa ka kyrteng u Dr. Ricky A.J. Syngkon kum u kyrtong ka seng, u Dr. Myrboh u la ong ba ka jingpynkhreh ka la ïaid shakhmat.
Haba kylli la ka don ne em ka jingïakren ban pan jingkyrshan na kiwei pat ki seng, u la ong, “Ngi don ka jingsngewskhem ba ngin jop beit, ngim sngew donkam ban leit ïatreilang bad kiwei-kiwei ki seng. Kumba ngi ju kren, ka seng jong ngi ka ïapher na kiwei pat ki seng. Ngi, ngim dei tang ba ngi kwah ïaleh ilekshon hynrei ngi kwah wanrah jingkylla ha ka synshar-khadar ha ka Jylla.”
Shuh shuh u la bynrap ba ka nongrim jong ka seng ka ïapher na kiwei pat ki seng saiñ pyrthei bad kumta ka seng kam lah ban ïatrei lang bad kiwei pat ki seng.
