Shillong, Nailur 10
U MDC barim ka Laban-Mawprem konstitwensi, Bah Ricky Shullai u la pynkhreh ban rung noh sha ka seng NPP ha kine ki sngi ban wan na ka bynta ban ïakhun ïa ka ilekshon MDC na katei ka konstitwensi ka ban long la shem snem (2024).
Kum ban shu pynkynmaw, u Bah Ricky Shullai u la shah rem da 19 vote ha u Bah Mitchael Wankhar uba ïakhun na ka seng NPP ha u snem 2019. Kumta u Bah Mitchael namar u sngewthuh ba un nym ïoh tiket na ka seng NPP u la rung noh sha ka seng UDP ha u snem 2022 ban ïakhun ïa ka ilekshon MLA ha u snem 2023 na Mylliem konstitwensi.
U Bah Ricky Shullai u dei u pyrsa jong u MLA ka BJP na South Shillong konstitwensi, Bah Sanbor Shullai. U sngewthuh ba ka eh ïa u ban ïakhun na ka seng BJP ha ka ilekshon MDC, bad dei halor kane ka bynta ba u kwah ban rung noh sha ka seng NPP.
Ki khubor kiba ïajan bha na ka seng NPP ki ïathuh ba u Bah Ricky Shullai un sa rung sha ka seng NPP ha ka 13 tarik mynta u bnai ha shlem treikam ka seng ha Lachumiere ryngkat u MLA barim ka Mawsynram konstitwensi, Bah H.M Shangpliang ha kaba u Myntri Rangbah ka jylla, Conrad K Sangma uba dei ruh u President ka NPP un pdiang burom ïa ki.
Haba pyrshang ban ïakren bad u Bah Ricky Shullai u la ong ba ka jingïakren ban rung sha ka seng NPP ka la ïaid shakhmat namar ïa mynta ka dang long mar shiteng, hynrei un sa pynthikna ïa ka tarik ban rung ynda la pynbeit bha hapdeng ki nongkyrshan jong u bad ka seng NPP.
