Shillong, Nailur 10
Ki kyrtong ki ban sa mih ban ïakhun ha ka ilekshon MP ha u snem 2024 na Shillong Lok Sabha konstitwensi ki lah ban don bun ngut, bad katkum ka jingsawa ka khubor, 6 tylli ki seng saiñ pyrthei kin sa sei kyrtong na kane ka konstitwensi.
Ki seng saiñ pyrthei kiba la sawa ban sei kyrtong ha ka ilekshon MP na Shillong konstitwensi ki long ka Congress kaba don lypa ruh ïa u MP, ka National People’s Party (NPP), United Democratic Party (UDP), BJP, Voice of People Party (VPP), bad All India Trinamool Congress (AITC).
Kumba ka paw, ka Congress ka la don u MP, u Bah Vincent H Pala tangba kam pat pynbna, bad ka VPP ka la dep pynbna lypa ïa u kyrtong jong ka u Bah Ricky Syngkon.
Ka NPP ruh ka la pynkhreh ban buh kyrtong ha kane ka ilekshon ka ban sa wan na Shillong konstitwensi, nalor ka Tura konstitwensi kaba don ruh ïa ka Agatha K Sangma kum ka MP mynta.
Kiwei pat ki seng saiñ pyrthei ki ban sa sei kyrtong ki long ka UDP, BJP, bad AITC.
Lehse ki lah shuh ban don ki kyrtong ki ban sa ïakhun ha kane ka ilekshon kum ki kyrtong shimet ne kiwei pat ki seng.
Ka UDP shen kan sa ïakynduh lang bad ka HSPDP ban ïatai bad ïarai lang haba ïadei bad u kyrtong uba ka seng kan sa sei kum u kyrtong monlang.
Ka AITC ruh ka la dep pynpaw ba kan ïakhun ïa ka ilekshon MP na Shillong wat lada ka seng ka don MLA tang uwei na Rilum Khasi Jaiñtia.
