Shillong, Nailur, 11
Ka North East Indigenous Peoples’ Forum (NEIPF), Shillong Chapter ba kynthup ïa ka seng FKJGP, RBYF bad HNYF, kaba la shong jingïalang ha ka 9 tarik mynta u bnai ka la rai ban pynpaw ïa ka jingpyrshah kaba jur halor ka jingthmu jong ka Sorkar National Democratic Alliance (NDA) ban pynkylla kyrteng noh ïa ka ‘India’ sha ka ‘Bharat’.
Ha u kyrwoh ba la phah sha ki lad pathai khubor lyngba u Nongaiktien ka NEIPF, u Bah Dundee C Khongsit, ka Forum ka sngew ba ka kyntien ‘Bharat’ ka dei kaba mih na ka Sanskrit bad ka dei kaba don jingïasnoh bad ka niam Hindu. Ka sngew ba kane ka jingthmu ka dei tang ka buit ban tyllep ïa kiwei pat ki niam kiba don ha kane ka Ri. Ka Ri India ka dei ka ri kaba ïakhleh bun ki Jaidbynriew bad bun tylli ki Niam bad ngi ngeit ba ka jingpynkylla ïa ka India sha ka Bharat kan sa ktah jur ïa kane ka jinglong ba kyrpang jong ka Ri India.
Ha kane ka jingïalang, ka Forum ka la rai ruh ban pyrshah jur halor ka jingpyntreikam ïa ka Uniform Civil Code (UCC) hapoh ka Jylla bad ka thaiñ Shatei Lam Mihngi ka Ri bad ka don jingsngew ba kane ka sienjam jong ka Sorkar Pdeng kan sa ktah jur ïa ki rit paid bad ki riewlum ha ka kolshor, ka jinglong tynrai, ka riam ka beit bad kiwei kiwei, ha kaba ka por kan sa poi ba kin ym sngew trai shuh ïa la ka jong ka Ri.
Halor ka jingjyllei jong u drok, ka NEIPF, ka la ïatai sani bha bad ka la rai ban dawa ïa ka Sorkar Jylla ba kan pyntreikam noh ïa ka Prevention of Illicit Traffic in Narcotic Drugs and Psychotropic Substances, (PIT- NDPS) Act 1988 ha ka jylla ban rat dyngkhong ïa une jingdih pynbuaid uba pynjot ïa ki samla, ki ïing ki sem bad ka imlang sahlang.
“Ngi la sakhi ïa ka jingkiew ki kam sniew khamtam ki kam tuh kam thiem ha man la ki shnong ki thaw. Ki kam tuh ki la jia man la ka sngi ha man la ki shnong haduh ba ki paidbah ki la hap thiah siar ïalade ha ka miet ka ïong. Ka daw hi ka dei namar ba tuh ban ïoh thied drok. Ka por kan sa poi ba lada kim ïoh tuh shuh da kaba suk, kin sa poi sha u pud ban rah da ki tiar bad rung jubor sha ki thliew ïing. Kaba sheptieng eh ka long ba suki-suki, kane ka kam drok ka lah ban pynkha ïa ki kynhun nongkhaïi ki ban sa pyndonkam da ki kor ki bor ka juk ban lah pynïaid ïew ïa u drok,” la ong u kyrwoh.
Ka NEIPF ka dawa ruh ban pynkha noh da ka tnad ba pura jong ka Anti Narcotics Task Force (ANTF) kumba long ka SB, CID ha Jylla, ka ban khlieh da u Heh Ophisar ba bat ïa ka kyrdan Inspector General (IG) ka ban peit thik tang ïa ki kam khaïi drok ha ka Jylla.
“Ka Jylla ka la don ïa ki Anti Narcotics Task Force (ANTF) ha man la ki District ka Jylla bad ïa kine ki kynhun la khlieh da ki Superintendent of Police (SP), kiba ïakhun ïa u drok ha la ki jong ki jong ki District, hynrei ka Jylla ka la donkam da ka tnad ba pura jong ka ANTF ka ban pynïaid na Headquarter ka tnad Meghalaya Police,” la bynrap u kyrwoh.
Ha kane ka sngi ka NEIPF ka la pynthymmai ruh ïa ki nongkitkam ba kynthup ïa ka FKJGP, HNYF bad RBYF bad ka la jied biang ïa u Bah Wellbirth Rani kum u Chairman ka Shillong Chapter, u President ka RBYF Bah Bipul Thangkhiew kum u Vice Chairman bad u Asst GS ka FKJGP Bah Kitboklang Nongphlang kum u Vice Chairman, President ka HNYF Bah Sadon K Blah kum u General Secretary, Vice President ka FKJGP Bah Eldie N Lyngdoh kum u Asst General Secretary lem bad u Bah Augustin Sten, President ka FKJGP Bah Dundee C Khongsit kum u Nongaiktien ka forum, u nongïalam ka RBYF Bah Wanpher Wahlang kum u Joint General Secretary ha ryngkat u Bah Shanbor Rapsang.
