Shillong, Nailur:
Ka Seng Kynthei Mawkhar Welfare Organisation (SKMWO) ha ka Sngi Saitjaiñ ka 9 tarik u Nailur, 2023 ka la pynlong ïa ka jingïadie ïathied bam bad ki tiar ki tar ïa kaba la tip kum ka ‘Carnival Festival’ kum shibynta ban ïoh pynmih pisa na ka bynta ki kam bad ki projek kiba ka seng kynthei ka thmu.
Ha katei ka sngi ka la don ka jingïadie ïathied ïa ki bam kiba bunjait, ki tiar ki tar bad ki la don ruh ki jingïalehkai kiba pynbyrngia ïa ki hep barit bad ki rangbah ruh kumjuh.
Ka kongsan ha katei ka sngi ka dei ka Kong Roshan Warjri kaba dei ka nongmihkhmat barim jong katei ka thaiñ ha ryngkat ka jingdonlang jong u Rangbah Shnong ka thaiñ, u Bah Arwan S Tariang, u Bah Ransom Sutnga bad ki nongkitkam jong ka shnong.
Haba ai jingkren ha katei ka sngi, ka Kong Roshan Warjri ka la pynpaw ïa ka jingsngewnguh bad ka jingsngewkmen kaba khraw bha ban ïa don bynta lang ha katei ka sngi ha ryngkat ka jingnoh ïa u synñiang kum ka dak ka jingsngewieid ïa ka seng kynthei kaba la shakri met bad mynsiem ïa ka shnong hi baroh kawei.
“Nga kitbok kitriang ba kan long kaba jop kum ka jingthrang bad ka jingangnud jong ka seng kynthei hi baroh kawei”, la ong ka Kong Roshan.
Haba ïoh ban ïakren bad ka Kong Careen Khongwir kaba dei ka Assistant General Secretary jong ka Seng Kynthei Mawkhar Welfare Organisation, ka la ong ba ka jingpynlong ïa katei ka ‘Carnival Festival’ ka long ban pynmih pisa na ka bynta ki kam bad ki projek kiba bun kiba ka seng kynthei ka leh mynta.
Ka la ong ba kawei ka projek kaba kongsan tam ba la leh da ka seng kynthei ka dei ka Lasara Play School kaba don hapoh ka Community Hall jong ka Dorbar Shnong ha kaba dei ka jaka kaba ju peit bad ri ki heprit khnang ban pynsuk ïa ki kmie ki kpa ha ryngkat ka jingai jinghikai bad ka jingshngaiñ ha ka por kaba ki kmie ki kpa kim don.
Shuh shuh ka Kong Khongwir ka la ong ba nalor ka Lasara Play School, ka seng kynthei ka ju ai khusnam ïa ki khynnah kiba pas bad leh bha ha ki eksamin bapher bapher kiba shong ba sah hapoh ka shnong Mawkhar.
“Kiba bun kiwei kiwei kiba ngi lah ban ïarap na ka seng kynthei, ki kam hapoh ka shnong kiba khia kiba bun, kumta ngi lah pynlong ïa kane ka Carnival da ka jingthmu ba ngin pynmih pisa na ka bynta kita ki projek ki jong ngi”, la ong ka Kong Khongwir.
