Nongstoiñ, Nailur 11
Ka West Khasi Student Union (WKSU) Sengkmie ha ka 8 tarik u Nailur, 2023 ka la leit ban aiti da ka dorkhas sha u Mission Director ka NHM ban dawa plie noh mardor ïa ki ar tylli ki jaka ai jingsumar sha ki paidbah kiba la shu pynsahteng haduh mynta wat hadien ba ka tnat ka koit ka khiah ka la dep ban pynkhreh.
U President ka WKSU, Bah D Sun u la ong, ki ar tylli ki jaka ai jingsumar sha u paidbah kiba haduh mynta ki la shu sahteng ki kynthup ïa ka Urban Health and Wellness Centre kawei ha ka shnong Mawkhlam Nongpyndeng bad kawei ha Pyndengrei Nongstoiñ.
Shuh shuh u Bah Sun u la ong, “Ha ka jingshisha ha ka 22 tarik u Nailar 2023, ïa kitei ki centre la dei ban plie noh bad wat ïa ki prokram ruh la dep shna da ka tnat ka koit ka khiah bad naduh ki mawnongrim ruh la dep ban thoh bad pyndait hynrei sngew lyngngoh ba la buhteng noh na ka liang ka NHM ban pynurlong ha katei ka por ba la dep pynkhreh nadong shadong da ka tnat ka koit ka khiah kaba don ha Nongstoin.
U la ong ruh ba ka WKSU ha kaba ïadei bad kane ka kyrpad ïa u Mission Director jong ka NHM ban plie noh mardor ïa kitei ar tylli ki jaka ai jingsumar ïa u paidbah jong ka thaiñ. Lada ka sorkar bad katei ka tnat ka dang buhteng ban plie noh, na ka liang ka WKSU kam banse ban shim da ki sienjam kiba tyngeh.
