Shillong, Nailur 11
Ka jingïalang hapdeng ka Meghalaya College Teachers’ Association (MCTA) bad u Vice-Chancellor (VC) ka North Eastern Hill University (NEHU), Prof. P.S. Shukla ha ka Lah Sngi U Blei kam shym la long kaba seisoh namar u VC um shym la treh ban weng ïa ka jingpynbna ba la phah sha ki kolej ha ka 12 tarik u Naitung mynta u snem.
Katei ka jingïalang kaba la sdang ha ka por 12 baje mynsngi ka la neh haduh 3 kynta duna.
“Ka jingïakren ka long ha ki 2 bynta – ka rukom shim ïa ka rai kumno ban pyntreikam ïa ka NEP-2020 naduh mynta u snem bad kaba ar ka long halor ki mat jingpule haba ïadei bad ka jingpyntreikam, ki jingeh kiba lah ban mih na ka jingpyntreikam ïa ka NEP-2020,” la ong u General Secretary ka MCTA, Dr. A.W. Rani haba kren sha ki lad pathai khubor.
U la ong ba ha katei ka jingïalang, u VC u la kubur ba ka don ka jingbakla ha ka jingpynbna ba la phah sha ki kolej ha ka 12 tarik u Naitung bad na ka liang jong u (VC) lem bad ka kynhun ki la pynsngew ba kin sa rah ïa kane ka jingpynbna ha ka jingïalang ban wan jong ka Academic Council (AC) ka ban sa long lehse ha kaba kut jong u bnai Risaw ne ka taïew banyngkong jong u Naiwieng mynta u snem.
“Haba ngi kylli un leh kumno ïa kane ka jingpynbna namarba ki don kita ki jingbakla – hato phin weng noh ne em…ïa kata da lade u ong ‘ngam treh ban weng namarba ki kolej ki la ïaid shakhmat bad ka NEP’ bad haduh mynta ym don uwei ruh u Principal uba ai jingthoh sha ki (NEHU) ba kim lah ban pyntreikam ïa ka NEP,” la ong u Dr. Rani.
“Ka shai hi ba u VC u ïaid ryngkat bad katei ka jingpynbna kaba la pynmih bad dei tang lada ki Principal kim lah, un sa weng ïa ka,” u la ong.
Ha kawei ka liang, u la ong ba ka jingkren u VC kam dei ban long ha kata ka rukom namarba ym dei ma u bad ki Principal ki ban rai, hynrei dei tang ka AC kaba dei ban leh ïa kata ka kam.
“Na ka liang jong ngi, ngi la ong ba ïa kane, naba ym shym la rai da ka AC, ka long be-aiñ bad na kata ka daw ngi kwah ïa u ba un weng noh bad lada um lah ban leh ïa kane ruh, ngi kren shai ba ngin ym lah ban weng ïa kane ka jingïakhih Non-Cooperation Movement (NCM) jong ngi,” la ong u General Secretary.
U la ïathuh ba ka jingïalang ka la ïakren ruh halor ki jingeh ha ka jingpule haba ïadei bad ka jingpyntreikam ïa ka NEP, ha kaba la sngewthuh shai ba kin don bun bah ki jingeh namar kumba ka long mynta ym pat don satia ïa ka ‘Syllabus’ kaba pura – ka don tang ka 1st bad 2nd ‘Semester’.
Shuh shuh u la bynrap, “Ïa ki tnad pule bapher-bapher kiba dei ban hikai, ki nonghikai kiba kumno, kumno yn thung ïa kita ki nonghikai, ki kolej kin ïoh naei ka jingkyrshan pisa bad kumta ter-ter nalor kiwei-kiwei ki jingeh jong ki samla pule.”
