Shillong, Nailur 11
Ka Voice of the People Party (VPP) ka la pynpaw ba ka ‘Show Cause Notice’ kaba mih ha ka 8.9.2023, ba la ai da u Director of School Education and Literacy, Meghalaya ïa ka Principal jong ka Government Girls’ Higher Secondary School, Jowai ka dei ka bym lah satia ban pdiang, kaba long kamkai, hynrei kaba buh jingsyier ruh ha kajuh ka por.
Ha ka kyrwoh khubor ba la pyllait da u Nongaiktien ka VPP u Dr Batskhem Myrboh u la ong, kane ka ‘show cause notice’ ka long bym don nongrim bad kaba pynlehraiñ ïa ka rukom jingtreikam jong ki ophisar sorkar ha ka jylla.
U la ong, ha ka jingshisha ki ophisar rangbah la khmih lynti ba ki dei ki ban treikam da ka jingstad da kaba bud ryntih ïa ka rukom treikam kaba shai bad kaba beit bha katkum ki aiñ ki kanun ban wanrah ïa ka rukom treikam kaba bit ba biang, hynrei kane ka ‘show cause notice’ ka long khongpong. Kane ka byrta (notice) ka mih lehse na ki artylli ki daw. Kaba nyngkong ka long ba une u ophisar ba pynmih ïa kane ka byrta ka dei kaba u leh hi dalade da ka jingbym tip bha ïa ki kyndon treikam jong ka Meghalaya Services (Conduct) Rules, 2019 lane ka dei ka jingleh jong u ban pyni ïa ka jinglah treikam ryngkat ka jingkhmih lynti ban ïoh jingïaroh na ki heh jong ki seng saiñ pyrthei ba synshar ïa ka jylla.
Ha kane ka byrta la ïohi ba une u ophisar um shym la kdew ïa kano ka kyndon ba ka Principal ka la pynkheiñ tat haduh ban da khot pynshai ne khot hajir ïa ka. Ha ka jingshisha ym ju don aiñ sorkar ban pynkitkhlieh ïa ki nonghikai ne ki shakri sorkar na ka bynta ka jingleh jong ki khynnah skul ne ki ‘riewshimet kiba ym shah kynthup satia ha ka Rules jong u snem 2019.
Ka daw ba-ar pat ka lah ban dei ba une u ophisar u ai ïa kane ka byrta halor ka jingbthah jong kita kiba don ha ka shuki lane ki politician kiba don hapdeng ka jingsyier na ka daw ka jingkyrshan ki paidbah ïa ka Voice of the People Party.
Ka long ka bym lah ban len ba ki don bun ki politician ne nongïalam saiñ pyrthei kiba la par ñiangkhriat bad suhjer namar ka jingai jingkyrshan ki paidbah ha kylleng kylleng ka jylla ïa ka jingkhot jingwer ka seng VPP na ka bynta ban wanrah ïa ka jingsynshar kaba khuid bad suba. Kumta kiba kum kine, ki don ka jingthmu ban pyntieng pynsmiej ïa ki paidbah da kaba wad ki lad ki lynti ban khanglad ïa kane ka jingieit ki paidbah ïa ka seng VPP. Hynrei lada ka long kumno kumno ruh, kawei kaba shai kdar bad ka paw ka long ba ki don ki heh sorkar ha ka jylla ki bym kot bor satia, ki bym sngewthuh bad ki bym don budlum ban leh ïa kaba dei.
“Ngin hap kylli ka lawei kaba kumno ka ap ïa ka jylla, haba don ki ophisar sorkar kiba kum kine. Ka VPP ka dawa ba une u ophisar u dei ban weng noh shisyndon ïa kane ka ‘show cause notice’ bad ha ka jingshisha u dei ban panmap khlem kano-kano ka kyndon ym tang na ka Principal jong ka skul, hynrei na ki paidbah baroh, namar ba ka jingleh jong u ka long ban ïuhroit ïa ka hok longbriew manbriew ki paidbah,” la pynkut ka kyrwoh na u Dr. Batskhem.
