Shillong, Nailur 11
Kum shi bynta jong ka sngi seng kaba 26, ka seng samla jong ka United Democratic Party (UDP) ka la pynlong ïa ka ‘Awareness Talk’ halor ka phang, “Youth and Drug menace” ha shlem treikam ka seng ha ka Lah Sngi U Blei.
Haba ai jingkren kum u ‘Resource Person’ ha katei ka prokram, u Director ka Manbha Foundation, Bah Anthony Syiemïong u la ong ba ka jingkyrni ha ki kam dih drok ka buh jingma ïa ka lawei jong kiba bun ki khun samla hapoh ka Jylla.
U la ban jur halor ka jingdonkam ban tehlakam ïa kiba kum kitei ki samla da ka jingsngewthuh, bad ban kitkhia na bynta jong ki khnang ba ki lah ban wanphai biang sha ka imlang-sahlang kum ki nongshong shnong kiba tei bad ba don ka jingkitkhlieh.
U la ong ba ka jingeh haba ïadei bad ka jingkyrni ha ki kam dih drok ka long kum ka khlam naba ki khynnah hapdeng 13 bad 14 snem ka rta ki la kyrni ha u drok.
Haba kdew ba ki ïakhun ïa ka thma kaba la rem lypa, u Bah Syiemïong u la ong ba ka jingdon jong ki samla kiba ngop ha u drok ka la nang kiew katba nang mih ki sngi.
“Ki don bun bah ki samla kiba ngop kiba la khlad noh ym pat dei por. Ngim don ïa ka jingkyrshan kaba khlaiñ bor ban tehlakam ïa kane ka jingeh,” u la ong.
Haba ban jur halor ka jingdonkam ban wanrah shuh ïa ki ‘Rehabilitation Centre’ hapoh ka Jylla, u la ong ba ki briew kiba wan na ki longïing kiba duna ka ïoh ka kot ki ïakynduh jingeh shi kat dei naba ka jingsumar ka long kaba rem dor.
Ka dor jong ka jingsumar ka long kumba T.35,000 na bynta shi kylla.
U Bah Syiemïong u la pynpaw ruh ka jingsngewsih halor ka jingbym don ki jaka kum ki Indoor Stadium ha kiba bun ki shnong khnang ban ai lad ïa ki khun samla ban ïadon bynta bad ban kiar na u drok.
“Ka don ruh ka jinglynga hapdeng ki samla namar ka jingbym don kam don jam. Kane ka long ruh shi bynta jong ka jingkyrni ha ki kam dih drok,” u la ong.
Kiwei-kiwei kiba la don lang ha ka prokram ki kynthup ïa u President ka State Youth Wing, UDP bad Myntri ka Sorkar Jylla, Bah Kyrmen Shylla, Working President ka seng, Bah Titosstarwell Chyne, bad Vice-President, Bah Allantry F. Dkhar.
