Shillong, Nailur 11
Kum shi bynta jong ka ‘World Suicide Prevention Day’, ka ophis District Mental Health Programme, East Khasi Hills ha ka Lah Sngi U Blei ka la pynlong ïa ka prokram halor ka “World Suicide Prevention Day” halor ka phang, “Creating Hope Through Action” ha U Soso Tham Auditorium, Shillong.
U Dr. Pakha Tesia, President, Indian Psychiatrist Society u la long kum u kongsan ha katei ka prokram.
Haba ai jingkren ha ka jingïalang, u Dr. Tesia u la ban jur halor ka bor jong ka jingïatreilang ha ka ban kiar na ka jingshim noh ïa ka jingim lajong ba ka lynti kaba biang tam ka long ban kiar na ki jingmut kaba ïalam sha katei ka bynta da kaba pynlong ïa ki prokram pynsngewthuh paidbah ha ka imlang-sahlang, kumjuh ban thaw ïa ka lad jingkyrshan hapdeng ki khynnah pule. U la ban jur halor ka jingdonkam ban kyrpad jingïarap ha ki liang bapher-bapher.
Ha katei ka prokram, i Dr. B. Sohkhlet, Consultant Psychiatrist, District Mental Health Programme, East Khasi Hills i la ai ka jingbatai bniah halor ka ‘World Suicide Prevention Day’.
Na ka liang u kongsan u la sam ruh ïa ki khusnam sha ki nongjop jong ki jingïakob bapher-bapher.
