Shillong, Nailur 11
Ka Sorkar Jylla ka dang pyrkhat mynta kumno ban pynrung lang ïa ka jaka mane bad jaka pule ynda la pynkynriah sha kawei pat ka jaka ïa ki briew kiba sah ha Them Metor sha kawei pat ka jaka.
Dang shen ka Ïingbishar ka la bthah ïa ka Sorkar Jylla ban pynbeit kloi namar kam pat lah ban pynbeit haba la don ka jingïakynduh hapdeng jong ka bad ki nongmudi kiba ïaid lyngba ka Harijan Panchayat Committee (HPC).
Na ka liang ka Sorkar Jylla ka la pan por saw taïew ban khmih ïa ka jingtyrwa kaba la phah biang da ka Harijan Panchayat Committee (HPC). Ka Ïingbishar ka la buh sngi ban bishar biang ïa ka mukotduma ha ka 29 tarik mynta u Nailur.
Kumta ka Sorkar kan sa batai ïa ka jingthmu jong ka hakhmat ka Ïingbishar lyngba u Advocate General ka Jylla.
La ong ba ka Sorkar Jylla ka dang khmih lang ïa ka jingtyrwa kumno ban pynrung lang ïa ka jaka mane kumjuh ruh ïa ka skul ha kajuh ka jaka kaba yn sa pynkynriah ïa kiba sah ha Them Metor.
Ka Sorkar ka dang peit katno ka jingheh ka jaka yn donkam na ka bynta ban pynrung ïa ki jaka mane bad ka jaka pule kiba la don lypa ha Them Metor.
Kum ban shu kdew, ki don kumba 342 tylli ki longïing kiba dei ban pynkynriah na Them Metor sha kawei ka jaka kaba la pynbeit da ka Sorkar Jylla.
Ka jingpynkynriah ïa kiba sah ha Them Metor ka dei ka mat kaba la sahteng da ki phew snem bad ka Sorkar Jylla ka la shim ki lad ki lynti ban pynkynriah noh naduh u snem 2018 kaba dang ïaid haduh mynta.
