Nongpoh, Nailur 11
Kum shi bynta na ki kam ban noh synñiang sha ka imlang ka sahlang, kawei na ki kynhun ha thaiñ Ri Bhoi kaba la tip kum ka Consumer Group, ha ka sngi Nyngkong ka la leit ban noh synñiang da ka pisa sha ka jaka ri khunswet jong ka sorkar ha Nongpoh, ka Government Childrens’ Home Boys.
Kumba la ïathuh da u nongseng jong katei ka kynhun, u samla Luckystar Ryntathiang, la ong ba katei ka kynhun kaba dang shu dep ban seng dang ha kine ki khyndiat bnai ba la dep, ka don ïa ka thong ban aikam aijam ïa ki samla bad ban kner jingïarap pat sha ki briew kiba donkam shisha ïa ka jingïarap da kaba pynlong ïa ki jingleh khalai nusib bad kiwei kiwei de ki jait kam.
U la ïathuh ruh ba ka seng ka ju die pat ïa kitei ki tiket khalai nusib sha ki nongshong ïew bad kumjuh ïa ki paidbah nongleit nongwan bad kiba jop, ki ïoh ban rah ïa ka Scooty, ka TV, ka Mobile phone lem bad kiwei kiwei ki tiar pyndonkam ïing.
Kumba long mynta, katei ka kynhun ka don kumba arphew ngut ki dkhot kiba ïatreilang shitrhem. Lyngba ka jingmynjur lang jong baroh ki dkhot, katei ka kynhun ka la shim pat ïa ka rai ban noh jingïarap sha kino kino ki briew lane ki longïing kiba donkam ïa ka jingïarap lyngba ka pisa kaba la pynmih na ka jingdie ïa ki tiket khalai nusib.
U Bah Jerry Gordon N Ryngnga, uba dei u Superintendent jong katei ka jaka ri khunswet, u la pynpaw ïa ka jingsngewkmen bad jingsngewnguh kaba khraw sha katei ka kynhun kaba la kynmaw ban wan khmih bad noh synñiang sha katei ka jaka ri khunswet kaba la ai mynsiem ïa ki khynnah kiba sah ha katei ka jaka bad ruh lyngba kine ki jingnoh synñiang, kan ïarap shikatdei ban lah ban pynbit pynbiang ïa ki jingdonkam ha katei ka jaka.
