Jowai, Nailur:
Ka Khadar Daloi Law College (KDLC), Jowai kaba dei tang ma ka marwei ka jaka pule ba ïadei bad ka aiñ ha Ri-lum Jaiñtia, ka la pynkup burom ïa ki samla pule kiba la wanrah nam ïa ka kolej ha ka risol LLB ba la pynbna da ka North Eastern Hill University (NEHU) ha ka 18 tarik Nailar, 2023.
Na ki 15 ngut kiba ïakhun ïa ka LLB ‘6th Semester’ 2023, 7 ngut dei kiba rung ha ka thup Top 10, 12 ngut kiba la wan ha ka kyrdan ‘1st Division’ bad u Wanbhalang Buam na kane hi ka kolej u la ïoh ïa ka nam ‘Topper’.
U Rapborlang Kharbihkhiew uba dei u MSC uba la wan ha ka kyrdan ba hynñiew, katba u Hame Shaniah Suiam, u khlur ïalehkai Kick Boxing ka Ri-lum Jaiñtia u la wan ha ka kyrdan kaba san.
Ha kane ka jingpynkup burom la donlang ka MLA ka Sutnga-Saipung, ka Kong Santa Mary Shylla, u MDC ka JHADC, u Phasmoon Dkhar, u President Governing Body, Dr. P.M. Passah, President ka Society For the Study of Law (SFCL), R. Lamarr, u Secretary ka SFSL J.B. Laloo bad kiwei-kiwei.
Ka Kong Santa Mary Shylla ha ka jingkren ka la ai khublei ïa baroh kiba la wan shakhmat bad pynshlur ruh ïa ki ban ïaid shaphrang ha ki kam ba bha jong ki.
Ha kajuh ka por, ka pynpaw ka jingsngewsih ba kane ka kolej ka neh bad long kumjuh khlem jingkylla. Kumta ka la kyntu ïa ki bor pynïaid ka kolej ban ai da ka jingthoh sha ka khnang ban ïarap katba lah ïa ki jingdonkam jong ka kolej katba ka dang don ha ka Sorkar.
