Shillong, Nailur 11
Ka seng BJP ka la nang pynjur ïa ka jinglynsher ktien ïa u MLA barim ka Mawsynram, u Bah Himalaya M Shangpliang, uba la mih noh na kane ka seng ha kine ki khyndiat sngi da kaba kynnoh ba ka don ka jingleh shiliang khmat jong u President ka BJP ha jylla, u Bah Ernest Mawrie.
Hadien ka jingshah kynthoh ha u Bah Mawrie, bad ka kynhun ki longkmie ka seng BJP, mynta ka la dei ka kynti sa jong u President ka Kisan Morcha lane ka kynhun ki nongrep ka BJP Meghalaya, u Bah Justice Syiem ban kawang ktien ïa utei u MLA barim uba la pynkhreh ïalade ban leit pynïasoh sha ka NPP.
“Ki jingkynthoh jong u Bah Hima pyrshah ïa u Bah Mawrie ki dei ki bym don nongrim, bym don jingshisha bad kiba shah liang,” la ong u Bah Justice ha u kyrwoh khubor ba la phah lyngba ka shlem treikam ka BJP.
U la kdew ba ha ki 6 snem ba u Bah Hima u la don ha ka saiñpyrthei, haduh mynta u la bujli seng bad nongrim ha ka sien kaba saw. U Bah Justice u la ong ba une u MLA barim u la don ha ka BJP tang khyndai bnai, bad watla u la don la 6 snem ha ka saiñpyrthei, hynrei u Bah Hima um pat sngewthuh ba ki nongtrei ka seng ki trei da ka mon sngewbha bad ka seng ka bynshet ïa ki kam ki jam da kaba peit ïa ka jingnang jong ki briew ban trei.
“Ka jingshah bynshet kam jong ka Kong Matilda Kharbuki bad kiwei ka dei halor katei ka nongrim ba la kdew, bad kam don satia ka jingleh shiliang khmat tang namar ba ki dei ki bahaïing hasem,” la ong u Bah Justice.
Ha kaba ïadei bad ka jingkam jong u Bah Hima ba u Bah Mawrie u la pyrshang ban khanglad ïa u ba un shimti kam ha ka sorkar MDA, u Bah Justice u la ong, “Kane ka jingkynthoh jong u Bah Hima ka pyni shai ba u la pynïasoh sha ka seng tang ban ïoh jingmyntoi saiñpyrthei shimet bad ym na ka daw jong ka nongrim ka seng lane ban shakri ïa ki paidbah.”
U la kdew ba ki don palat spah ngut ki nongtrei ka BJP kiba la trei shitom bad kiba donkam ban ïoh jingithuh bad namarkata, dei tang ka seng kaba donbor ban shim rai ïano donkam ban ai bhah.
“U Bah Shangpliang u la pynïasoh dang ha u bnai Naiwieng 2022 bad u la ïoh ïa ka jingkyrshan bapura na ka seng ha ka ilekshon MLA, hynrei u khlem poi sha ka thong. Lada dei u briew uba bat nongrim, u la dei ban ap ïa ka por tat haduh ba ka seng kan bynshet kam ïa u,” la ong u Bah Justice.
Shuh shuh u la ong ba katto katne bnai hadien ba la kut ka ilekshon bad haba la donkam ban pynthymmai ïa ki nongkitkam ka State Kisan Morcha, la kyntu ïa u Bah Hima la bunsien ba un phah ïa ki kyrteng khnang ban ïoh thung ïa ki nongkitkam ka Kisan Morcha ha ka jylla bad ban thaw ïa ka Kisan Morcha Mandal ha Mawsynram. Hynrei u Bah Justice u la kynnoh ba man la ka por, u Bah Hima u la ai daw ba u khlem pat lah ban ai ïa kitei ki kyrteng na ka daw ba u bunkam palat bad ki kam sorkar. Ha ka jingshisha, u Bah Justice u la ong, u Bah Hima u khlem leh eiei na ka bynta ka jingbit jingbha jong ka BJP ha ki khyndai bnai ba u la don bad ka seng.
