Shillong, Nailur 11
Ki jaiñ Ryndia na ka jylla Meghalaya ki la khring ïa ki briew kiba napoh bad shabar ri kumjuh ha ka lympung jong ka jingïalang ki Ri kiba don ha ka kynhun G20 ha nongbah New Delhi haduh ba wat u Myntri Rangbahduh, u Narendra Modi, u la pynpaw ïa ka jingitynnad jong kine ki jait jaiñ.
Ka Meghalaya ka la buh ïa kawei ka jaka pyni nam jong ki jaiñ bad ki tiar ba la shna da ki kti ha ka ‘Crafts Bazaar’ ha ka lympung G20 ha Bharat Mandapam, Pragati Maidan naduh ka 8 haduh ka 10 tarik Nailur.
Hynnin ka sngi, u Modi u la leit sha katei ka jaka ban ïakren bad ka kynhun kaba don hangto bad u la pynsngew ïa ka jingitynnad jong u ïa ka jaiñ Ryndia kaba ïahap bad ki sienjam ba la tip kum ki Sustainable Development Goal (SDG) na ka bynta ka jingtrei ban pynneh ïa ka mariang, jingpynkupbor ïa ki longkmie bad ki lad kamai kajih kiba ïaineh.
Na ka liang ka Kong Dipika Lyngdoh ka la batai bniah shaphang ki jaiñ Eri na Meghalaya bad ka la batai ïa ki bynta bapher bapher jong ka jingpynmih ïa kine ki jaiñ da ki briew ba don sap jong ka Meghalaya.
Kane ka Crafts Bazaar ka la pyni ïa ki tiar ba shna da ki kti na kylleng ka India da kaba peit bniah ïa ka One District One Product (ODOP), ki tiar ba ïoh jingithuh GI bad ki tiar ba shna da ki riewlum bad ki longkmie.
Ki nongïashim bynta ha kane ka jingïalang G20 ki la ïoh ban leit sha kane ka Crafts Bazaar bad thied ïa ki mar. Ïa kane ka jingpyni kyrpang la pynlong da ka G20 Secretariat ha ka jingïatreilang bad ka tnat Textiles bad ki Sorkar Jylla/Union Territory.
Kumba 30 tylli ki Jylla bad ki Union Territory ha ryngkat ki kynhun ka Sorkar Pdeng kum ka Khadi Village & Industries Commission, TRIFED, Saras Ajeevika ki la ïashim bynta ha ka Crafts Bazaar. Ban pyni ïa ki tiar ba itynnad bha kiba shna ha ka thaiñ Shatei Lam Mihngi, la buh ïa ka shlem ‘Focus North East’ ha ka jingïatreilang bad ka North-Eastern Handicrafts & Handloom Development Corporation (NEHHDC).
