Shillong, Nailur 11
Ka Jaiñtia Students’ Union (JSU) Sengkmie bad ka Khliehriat Circle ha ryngkat ki nongïalam shnong Thangskai ki la leit ban kynduh ïa ka Myntri ka tnat ka koit ka khiah ka Kong Ampareen Lyngdoh bad ka seng ka la buh da ka shithi ujor ïa ka sorkar halor ka jingpynrung kyrteng ïa u Ayush Kumar ha ka thup pule MBBS.
Ha kane ka jingïakynduh, ka Myntri ka la pyntip ba ka sorkar ka pdiang ïa ki kot ki sla kaba la phah na ka shlem treikam u DC bad la shem ba u Ayush Kumar u la ai da ka PRC kaba u la ïoh na shlem treikam u DC ha u snem 2021. Ka Myntri ka la ong ruh dei ban pan jingshai ban ujor ha u DC ka East Jaiñtia halor ka jingai PRC ïa une u bar jylla.
Halor kane, ka seng ka la dawa na ka sorkar da lei lei ym dei ban ailad ïa u Ayush Kumar ban leit pule MBBS namar katkum ka jingtip ba um dei satia u nongshong shnong ka Thangskai bad ka seng ha ryngkat lang bad ki nongïalam shnong kin sa leit ban kynduh ïa u DC bad tih bniah halor ki kot ki sla jong u Ayush Kumar. Lada shem shisha ba une u bar jylla u leh thok, ka seng kan ym ailad ïa u bad na ka liang ka sorkar ka dei ban pynduh shi syndon ïa ka bhah pule MBBS ïa u.
Ka seng ka phah ruh ïa ka kyrwoh kaba shai sha baroh ki nongïalam shnong jong ka rilum Jaiñtia bad sha baroh ki nongïalam shnong ka Bri u Hynñiewtrep ba kim dei shuh ban ai syrnot lane kino-kino ki NOC ïa ki bar jylla khlem da tih bniah la kine kiba pan syrnot ki dei hok ne em ban ïoh ïa ki kot na shnong na thaw.
