Shillong, Nailur 12
Ka State Environment Impact Assessment Authority (SEIAA), Meghalaya, ha ka jubab ba ka la ai sha ka seng Hynñiewtrep Integrated Territorial Organization (HITO) ha ka Lah Sngi U Blei, ka la pynshai ba kam pat ai satia ïa ka ‘Environmental Clearance’ (EC) sha ka Meghalaya Cements Limited, ka karkhana kaba pynmih ïa ka dewbilat Topcem, ha East Jaiñtia Hills.
Ha ka shithi ba la ai da u Member-Secretary ka SEIAA sha ka HITO, la batai ba ki don saw tylli ki bynta kiba hap ban pyndep ha shwa ban ai ïa ka ‘Environmental Clearance’ sha kino-kino ki karkhana bad kine ki long katkum ki kyndon Environmental (Protection) Rules, 1986. Hynrei ym baroh kine ki saw bynta ki lah ban treikam ha man ki khep.
Ka jingpan jingpynshai ka HITO na ka SEIAA ka long hadien ka jingmih khubor ba la dep ban ai ïa ka syrnod ‘Environmental Clearance’ sha katei ka karkhana ban pynkiew ïa ka jingpynmih dewbilat na ka 2,600 TPD sha ka 4,500 TPD bad ka jingbuh ïa ka shlem pynmih bording kaba 10 MW Captive Power Plant (CPP) bad ka Waste Heat Recovery System (WHRS) kaba 9.5 MW.
Dang shen ha ka 24 tarik Nailar, ka la mih ka jingïakynad hapdeng ki paidbah bad ki pulit ha Thangskai ha ka sngi ba la pynlong ïa ka jingsngap ïa ka sur ki paidbah lane ‘Public Hearing’ halor kitei ki jingthmu ka karkhana shna dewbilat. Ka jingïakynad ka la long kaba jur ha kaba ki paidbah ki la shah bom shah tied.
Ka SEIAA ka la batai bniah ïa ki jingdonkam ban hap ban leh ha shwa ban shim rai la yn ai ne ym ai ïa kata ka ‘Environmental Clearance’ sha ki karkhana. Khlem kane, ki karkhana kin ym lah ban sdang ïa ki jingtreikam jong ki la ki dei kiba thymmai ne kiba thmu ban pynheh bad pynïar ïa ka jingtreikam kumba long ka Meghalaya Cements Limited.
