Shillong, Nailur 12
U MLA ka Nongpoh, Bah Mayralborn Syiem u la ong ba kawei na ki daw jong ka jingkiew dor palat jong ki mar bam mar dih ne kiwei kiwei ki tiar ki tar ka dei na ka jingbun bad jyllei jong ki khyrdop khrong khajna ba la pynïeng ha ki surok bah.
“Kumba ka long mynta, ki mar ki mata kiba wan na kiwei kiwei ki jylla kin hap ban ïaid lyngba kiba bun ki khyrdop khrong khajna beaiñ kiba don ha ki jylla bapher bapher, kumta na ka liang ki malik ki hap ban pynkiew ïa ka dor namar ka jinglut nalor ka bai mar, la hap kheiñ lang sa ïa ka bai siew ha kine ki khyrdop,” la ong u Bah Mayralborn haba kren sha ki lad pathai khubor.
U la ong ba ka jingkiew dor jong ki mar ki mata, la ki dei ki mar bam mar dih ne kiwei kiwei ki tiar kiba pyndonkam ka long kawei na ki mat kaba kongsan bha, kaba baroh ki mad.
“Kumba ka long, kawei pat ka daw jong ka jingkiew dor ka dei ba ngi hapoh ka jylla ngi dang hap ban shaniah ïa ki mar bam mar dih kum u khaw, phan, piat nalor kiwei pat ki mar kum ki dawai dashin, ki tiar ki tar na kiwei pat ki jylla. Kumta ka jingdon jong ki khyrdop kiba lum pisa na ki kali ba wan kit mar, ka nang pynsyllang shuh ïa ki paidbah ha kaba ïadei bad ka jingkiew dor jong ki mar,” u la ong.
Shuh shuh une u MLA ka Nongpoh u la ong ban kham lait na kine kiei kiei, kat kum ka jingsngew shimet ka jong u, la donkam ban wanrah noh ïa ka rel kit mar haduh Byrnihat, namar wat la kam ïarap 100 na ka 100 hynrei kan pynduna bun ha ka jinglut jingsep.
U la ong kawei pat ba hap ban buh ha ka jingmut jingpyrkhat lada wanrah ïa ka rel kit mar, ka long ba dei pat ban don ïa ki aiñ kiba khlaiñ ban ïada na ka jingwan buhai shnong jong ki briew nabar jylla, nuksa kum ka Inner Line Permit (ILP) ka dei kaba kongsan bha.
“Ngi donkam ban don ïa ki aiñ kiba khlaiñ, namar lada ïakren ïa ka jingkiew dor jong ki mar bam mar dih, nga sngew ba ka rel kit mar kan long kaba donkam ban wanrah noh bad lada wan pat ka rel kit mar, dei ban don sa ki aiñ kiba khlaiñ ban ïada na ka jingwan rung kyrthlep jong ki briew ba nabar,” la ong u Bah Mayralborn.
Shuh shuh u la ong, nalor ki aiñ, ki Dorbar Shnong ruh ki dei ban long kiba khlaiñ khamtam lei ha ki shnong ba don ha khappud ban peitngor bad khanglad ïa ki briew kiba nabar ban ïoh rung sha ki shnong ki thaw.
“Hooid, ka jingdonkam ïa ka rel kit mar ka la long hakhmat, wat la kan nym lah ban pynhiar dor shispah na ka shispah hynrei kan ïarap pat shibun,” la ong une u MLA ka Nongpoh.
